Muṱaṱisano wa mitambo ya musangwe yo vhuya hafhu.

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Mitambo ya Musangwe ya ṅwaha na ṅwaha yo vuwa hafhu. Mitambo ya u thoma yo tambiwa ngei Tshifudi, nnḓa nyana ha Ṱhohoyanḓou, nga Mugivhela wa ḽa mbili Nyendavhusiku.

Minwaha ya murahu vhathu vhovha vhesi vhanzhi vhane vha dzhenela mutambo uyu, fhedzi naṅwaha vhathu vha maḓana vhovha vho kuvhangana vha tshi ṱalela mutambo uyo nga ḓuvha ḽau thoma.

Vho Pfarelo Mahadulula, vhane vhavha munwe wa vhadzudzanyi vha mutambo uyu, vhovha vho ḓala dakalo musi vhe kha dzudzanyo dza ṅwaha uno. “Zwa zwino zwithu zwoṱhe zwo dzudzanyea, ṅwaha uno ndi une wa ḓo fhambana na minwe minwaha. Ro ramba na vharangaphanḓa vha mivhundu ine vhatambi vha Musangwe vha dzula hone na vhalangi vha Musangwe. Ri fulufhela uri vhathu vha ḓoḓa nga vhunzhi u ṱalela mutambo wa vhomakhulukuku wavho,” vha amba.

Vho Mahadulula vhari u vhona thimu nnzhi dzo dzhenelela nau tamba nga ḓuvha ḽau thoma zwovha dakalo ḽihulu khavho. “Hovha na mitambo i paḓaho fumbili-sumbe, he havha ho ḓala vhaswa. Zwine zwa takadza ndiuri na vhathu vha fanaho na Vhokota, Vhongwazi, na vhaṅwe vhanzhi vhovha vhe hone. Naho husina zwine vha khou ṋeiwa sa dzi pfufho, vhoḓi imisela vhukuma u tamba Musangwe. Zwi tou sumbedza u funa mutambo wa Musangwe kha vhadzulapo,” vha engedza.

Vho Abraham Rabali, vhane vhavha mune wa fhethu hune ha tambiwa mutambo wa mavili, vhovha vhe hone nga ḓuvha ḽau vula mitambo iyi. “Vhaṱhannga vhanga vho ḓi lugisela. Zwa zwino ro awela nga u vhona mufhiso, ngavhe husi nyimele dza mufhiso, rovha ri tshi ḓo tamba ḓuvha ḽiṅwe na ḽiṅwe. Vhatambi vhari vhoḓi imisela vhukuma u tamba nga mafulufulu,” vha amba.

Vhane vha ṱoḓa zwidodombedzwa nga ha u dzhenelela mitambo ya Musangwe, vha nga founela Vho Mafhungo Mphathele kha 076 337 5754 kana Vho Pfarelo Mahadulula kha 064 947 3835.

Date:14 December 2023

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019.

Read: 301