Ramuzika wa muzika wa bubblegum Vho Patrick Magedze vho lovha.

Ṱhalutshedzo nga: Khathuthutshelo Raliphaswa.Tshitori nga Elmon Tshikhudo.

Nḓowetshumo ya muzika na lushaka nga u angaredza vho xelelwa vhukuma zwi tshi tevhela u ri sia fhano shangoni ha ramuzika wa muzika wa Bubblegum, Vho Patrick Thinawanga Magedze. Vho Magedze vho lovha nga ḽa fumi-na-raru Nyendavhusiku. Vho lovhela vhuongeloni ha NHC Thavhani ngei Ṱhohoyandou nga murahu ha u lwa na dwadze lwa tshifhinga tshipfufhi vhe na minwaha ya fuṱhanu-malo. Vho Magedze vhovha vhe muraḓo wa tshigwada tshe tshavha tshitshidivhea tsha Patleo.

Khaladzi avho, Vho Thidivhiwi Mavis Magedze Nemakanga vho khwaṱhisedza uri Vho Magedze vhovha vha khou lwa na vhulwadze uho lwa tshifhinga tshipfufhi. “Khaladzi anga vhovha vhe zwoṱhe kha nṋe, sa izwi na nṋe ndovha ndi zwoṱhe khavho. Rovha ri tshi kovhelana zwoṱhe. Naho vhovha vha tshi shuma mishumo miṱuku ya u tou vhidziwa, vhovha vha tshi kona u thusa muthu munwe na munwe ane avha na tshililo tsha zwino na zwiḽa. Ndovha ndi tshi kovhelana muholo wanga navho hu u itela uvha leludzela vhutshilo.

Ndovha ndi tshi dovha hafhu nda ṱuṱuwedzwa nga u vhona lufuno lwe vhavha vhe nalwo kha vhathu. Nga u vhona vhuṱungu he vhavha vhe khaho, ndi tenda uri zwa zwino vha na mulalo. Zwa zwino ndi nṋe ane a khou pfa vhuṱungu, fhedzi ri ṱoḓa u vha ṋea mbulungo ya tshidele,” vha amba.

Mufarisani wavho kha zwa mabindu, vhane vha dovha vhavha ṱhama yavho, Vho Leonard Muvenda, vhe vha thoma navho tshigwada tsha Patleo, vhari lufu lwavho lwo sia tshikhala tshi si na tshithu vhutshiloni havho.

“Vho Magedze vhovha vha tshi fhira uvha mufarisi kha nṋe. Ro aluwa roṱhe, ra dzhena tshikolo roṱhe hone ri tshi dzula ri roṱhe. Nga murahu ha u ṱhaphudza murole wa vhufumi na mbili, ro ḓou ya tshikoloni tsha muzika kha vunḓu ḽa Gauteng. Ndi he ra thoma tshigwada tshashu, muzika washu wavha u takalelwaho nga vhathu vhanzhi. Ra sika lushaka lwa muzika wa bubblegum. Ndi ḓovha elelwa sa ṱhama vhukuma kha nṋe, “ vha amba.

Vhafunzi Vho Thivha Lidzhade, vhe vha ḓivha Vho Magedze vha tshe muswa, vhari vho vhaisala vhukuma nga lufu lwavho sa izwi vhovha vhe ṱhama na murathu khavho. “Vhovha vhe muthu ane a humbulela vhanwe vhathu, vhovha vha tshi anzela u ṱoḓa u ḓisa tshanduko matshiloni a vhanwe vhathu. Ndi takalela uri mbeu ye nda zwala khavho nga u vha isa tshikoloni tsha muzika ngei El Shaddai nga 1985, vhe na Vho Muvenda, zwo vha swikisa kha uvha madzhakanḓila kha nḓowetshumo ya muzika, “ vha amba.

Aḽibamu ya tshigwada itsho tsha Patleo ya u thoma yo vhidzwa “Looking In” ye ya swika kha vhuimo ha musuku. Yo tevhelwa nga nyimbo ya “Pick Eight”, “Ten of the Best”, “Y These” na lwa “Millenium.”

Vhovha ramuzika vhe vha ṅwalela na zwinwe zwigwada zwa muzika u fana na tshigwada tsha Malumi Piki Piki, Jekete, Stargoman, Zwina phungo, Paul Mulaudzi, Peter Maringa na vhanwe vhanzhi.

Vho Magedze vha ḓo vhulungiwa hayani havho nga Ḽavhuṋa, ḽa fumbili-na-nthihi Nyendavhusiku.

Date:20 December 2023

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019.

Read: 389