Vhakoma thuntshwa vha lovha nḓuni yavho

Tshiṱori nga: Silas Nduvheni. Ṱhalutshedzo nga: Khathutshelo Raliphaswa.

Vha muṱa wa ha Lithole na vhadzulapo vha muvhundu wa Tshitereke Thondoni vhovha vho shushwa nga murahu hau wanala ha Vhakoma Nndwakhulu Lithole vha tshi waniwa vho thuntshwa vha lovha ngomu nḓuni yavho.

Mapholisa vha Ṱhohoyanḓou vha khou sedzulusa mulandu wa bulayo, hone zwa zwino ahuna muthu ono farwaho. Uya nga muambeli wa mapholisa a Limpopo Col Malesela Ledwaba, vhari munna asa ḓivhei o ṱhasela Vhakoma nḓuni yavho nga matsheloni a Ḽavhuṋa, ḽa fumi-na-malo Phando, vho eḓela a thoma u thuntsha asa londi a mbo shavha. “Mufumakadzi we avha e na vhakoma avho o kona u bva a songo huvhala. Ndi he a founela mapholisa vha swika na vha tshumelo ya shishi. Vhakoma vho mbo bulwa muthu o asatshatshilaho na zwenezwe,” vha amba.

Mukhomishina vho tou farelaho, Maj-Gen Jan Scheepers, vho kaidza zwiito zwa bulayo iḽi hone vho laedza vhasedzulusi uri vha zwime vhahumbulelwa uri vha livhanywe na tshanḓa tsha mulayo. “Vhavhulayi vhane vha ṱhasela vhathu vhane vha balelwa u ḓi lwela vha fanela u zwimiwa vha farwa, vha livhanyiwa na tshanḓa tsha mulayo nga vhuḓalo,” hu amba Vho Scheepers.

Muambeli wa muṱa, Vho Gideon Lithole, vhari sa muṱa vha tshe vho shushiwa nga bulayo ḽa Vhakoma. “Vhakoma vhovha vhe muthu wa vhathu. Rovha ri sa athu upfa upfi vhovha vha khou lwa na muthu kha muvhundu wavho u swika ri tshi pfa uri vho thunthswa vha lovha. Vhovha vhe tshanḓa tsha Vhamusanda vha thembeaho vhe vhavha vha tshi thusa Vhamusanda kha u tandulula khuḓano muvhunduni.”

Vho Gideon vhari Vho Lithole vho thoma zwa vhulimi musi vha tshi notha kha gudedzi ḽa Madzivhandila Agricultural College nga ṅwaha wa gidimbili raru, he vha shuma sa muofisiri wa zwa vhulimi.

Munwe wa vhadzulapo, Vho Mphathiseni Nemadzivhanani, vhari vho guda zwinzhi kha Vho Lithole u fana nau tandulula dzi thaidzo vha songo dzhia masia.

Ane avha na zwine zwa nga thusa mapholisa kha tsedzuluso dzavho nauri vha fare vhahumbulelwa vha nga kwama muofisiri wa tsedzuluso, Lt Col Mphaphuli Ndileni kha 082 959 7705, kana vha founela nomboro dza lushaka dzau thivhela vhugevhenga dza 08600 10111, kana vha tou isa muvhigo tshiṱitshini tsha tsini navho.

Date:29 January 2024

By: Silas Nduvheni

Read: 262