Senthara ya Robert Mphephu fitness yo vulwa hafhu Thohoyandou

Tshiṱori nga: Silas Nduvheni. Ṱhalutshedzo nga: Khathutshelo Raliphaswa.

U vulwa hafhu ha senthara yau fhaṱa mivhili na mitakalo ya Robert Mphephu Fitness Centre ire Ṱhohoyanḓou, tsini na ofisi dza masipala wa Thulamela, hu sumbedza i tshi ḓo sika mishumo kha vhathu na u vha thusa uri vha dzule vhe na mutakalo wavhuḓi na u fhaṱa mivhili zwavhuḓi. Senthara iyo yo vulwa hafhu nga Mugivhela, wa ḽa fumbili-sumbe Phando.

U fhaṱwa ha senthara iyo zwo thoma nga ṅwaha wa 2004, ha vulwa lwa u thoma nga ṅwaha wa 2007, fhedzi nga hone u ṱangana na dzi khaedu dza vhulangi vho ḓou kombetshedzea u vala vha tshi vula lwa tshivhalo. Mune wa tshifhaṱo itsho, ramabindu a ḓivheaho Vho Robert Mphephu, vho ḓou dzhia tsheo yau vusuludza senthara iyo vha i langa ngavhone vhane .

Vhe vha vulwa senthara iyo lwa tshiofisi ndi Thovhele Gole Mphaphuli, vhe vha fhululedza Vho Mphephu kha u swikelela u vusuludza vha vula senthara iyi hafhu zwine zwa ḓo kona u sikela vhathu mishumo na uvha leludzela nḓila dza u tshila matshilo a vhuyedzaho mivhili yavho. Uya nga Thovhele Mphaphuli, senthara iyi i ḓo thusa kha u lwa na dzi khakhathi na dzi khaedu dzine vhadzulapo vha ṱangana nadzo, u fana na vhathu vha tshi ḓi nekedzeka kha u ṅwa mahalwa lwo kalulaho. “Ndi na fulufhelo ḽauri senthara heyi iḓo ṱuṱuwedza vhathu uri vha shume na uḓi ṱhogomela zwavhuḓi,” vha amba.

Vho nedorobo vha Thulamela, Vho Athingozwidivha Sarah Rambuda vhari muvhuso u woṱhe au koni u sikela vhathu mishumo, fhedzi uvha hone ha vhoramabindu zwia thusa u sikela vhathu mishumo. Vhari senthara ya Robert Rambuda yo sikela vhathu vha fumi-malo mishumo. “Ri ṱuṱuwedza vhadzulapo uri vha shumise senthara iyi i ḓo vha thusa u tshila matshilo are na mitakalo,” vha amba.

Vho Phelma Klokow, vhane vhavha tshipiḓa tsha vhulangi ha senthara iyi, vhane vhavha na tshenzhemo ya minwaha ya fumbili sa mugudisi kha zwa mutakalo na u fhaṱa mivhili, vho ramba vhadzulapo uri vhavhe tshipiḓa tsha dzi nyonyoloso dzavho. Vhari vhovha vhe na ndivho ya uvha senthara ya vhutsila, hune vhathu vha kona u fhaṱa mivhili yavho nau swikelela ndoro dzavho dza u tshila matshilo avhuḓi are na mutakalo.

Date:05 February 2024

By: Silas Nduvheni

Read: 273