U valwa ha tshikolo tsha Mavhungu Andries zwo sia vhabebi na dzi kahedu

Tshiṱori nga: Thembi Siaga. Ṱhalutshedzo nga: Khathutshelo Raliphaswa.

U valwa ha tshikolo tsha nṱha tsha Mavhungu Andries thine tsha wanala kakusi kwa Tshakhuma zwo sia vhunzhi ha vhabebi vha khou ṱangana na dzi khaedu dzi konḓaho zwihulu kha masheleni au badela zwiendedzi zwa vhana vhavho uri vhaye zwikoloni. Tshikolo itshi tsho valwa nga ṅwedzi wa Luhuhi ṅwaha wo fhelaho, ha kwamea vhagudiswa vha ḓana furathi-ina vhe vhavha vha tshi dzhena kha tshikolo itsho. Vharangaphanḓa vha vhupo uho vho isa khumbelo na mbilaelo dzavho kha vha muhasho wa pfunzo uri vha vula hafhu tshikolo itsho.

Vha nyanḓadza mafhungo ya Limpopo Mirror vhovha na nyambedzano na vhaṅwe vha vhabebi na vharangaphanḓa muvhunduni nga Lavhuṱanu, ḽa fumbili-rathi Phando, vhe vhari vhovha vha songo vhudziwa musi hu tshi dzhiiwa tsheo yau vala tshikolo vhagudiswa vha pfuluselwa kha zwikolo zwi fanaho na Tshiemuemu, Gwamasenga na Nndamuleleni. Izwi zwo itea naho hovha na ṱhanganyelano yau alusa masheleni au fhaṱa dzinwe phera dza u gudela kha tshikolo itsho.

Vhunzhi ha vhagudiswa, zwihulu vhane vha bva miḓini ya vhushai, vha fanela u tshimbila khilomithara dza fumbili uya na u vhuya kha zwikolo zwavho zwiswa ḓuvha ḽiṅwe na ḽiṅwe. Nyimele iyo yo kombetshedza vhaṅwe vhagudi uri vha litshe zwikolo.

Vho Livhuwani Tshilate, muṅwe wa vhabebi vhare na mbilaelo, vho ṱahisa uri ḓuvha ḽiṅwe na ḽiṅwe vhavha na khaedu yau badela masheleni zwihulu ngauri avha shumi fhethu. “Ri khou tambula, hone ri dovha hafhu ra vhilaela nga ha tsireledzo ya vhana vhashu zwihulu kha vhana vha vhasidzana nga matsheloni. Muṅwe wa vhana vhashu o tshipiwa zwa vhege dzo fhiraho, lune ri khou humbela uri vha muhasho wa pfunzo vha vule hafhu tshikolo tsha Mavhungu hu u itela tsireledzo ya vhana vhashu,” vha amba.

Vho Osly Nyamande, vhane vhavha tshanḓa tsha mudzulatshidulo vha davhi ḽa SANCO ḽa Tshakhuma, vho ṱahisa mbilaelo dzavho nga ha u thudzelwa kule ha mbilaelo dzavho nga vha muhasho wa pfunzo. Vhari u ḓala ha vhagudiswa zwikoloni zwi sia zwikolo zwi si na themamveledziso, ngeno zwikolo zwi tshi sala zwo tshinyadzwa. “Ri khou vhilaedzwa nga u litsha tshikolo ha vhagudiswa vhanzhi na khaedu dza masheleni dzine vhabebi vha ṱangana nadzo sa izwi vhunzhi havho vha sa shumi,” hu amba Vho Melta Nemukundela, muraḓo wa khorombusi ya tshikolo tsha Mavhungu.

Vha muhasho wa pfunzo vha tshi vhudziswa nga ha u thola vhalindi vha tsireledzo kha tshikolo tsha Mavhungu uri vha thivhele u tshinywadzwa ha ndaka, muambeli wa muhasho, Vho Mike Maringa, vhari ahuna vhalindi vha tsireledzo vhe vha tholwa kha tshikolo itsho. “Tshikolo a tshi ngaḓo vulwa. Zwine vhabebi vha khou amba ndi zwine a zwina vhuṱanzi,” vha amba.

Date:05 February 2024

By: Thembi Siaga

Thembi Siaga started as an intern during 2021. He assisted with video photography and editing. He also produced numerous small documentaries, focusing on the Vhembe region and its people. Currently he works as a freelance journalist, covering stories in the Elim area.

Thembi studied at the Tshwane University of Technology, where he completed his diploma in Journalism in 2021.

Read: 211