Vhagudiswa vha 36 vho hwalelwa vhuongeloni ha Donald Fraser

Tshiṱori nga: Maanda Bele. Ṱhalutshedzo nga: Khathutshelo Raliphaswa.

Vhagudiswa vha paḓaho furaru-rathi vha tshikolo tsha Gunda, tshire Halambani, nnḓa nyana ha Ṱhohoyanḓou, vho hwalelwa vhuongeloni ha Donald Fraser nga murahu ha u lila nga ha u pfa vhuṱungu thumbuni nga Musumbuluwo wa ḽa fumi-na-mbili.

Ṱhoho ya tshikolo, Vho Ndivhuwo Samuel Makhuvha, vhari vhagudiswa vho thoma u lila nga u pfa vhuṱungu nga murahu ha tshifhinga tshavho tsha uḽa. “Vhunzhi ha vhagudiswa vho thoma u tanza, ndi he vha vhudziswa uri naa vho ḽa mini. Ndi he ra wana uri vho ḽa masimba a dzina ḽithihi. Rori ri tshi vula masimba ayo ra wana e na zwithu zwi fanaho na maboḓelo o kwashekanaho. Ro ḓou vha isa kiḽiniki ya tsini, vhe vhari rumela vhuongeloni ha Donald Fraser. Vhagudiswa vha furaru-ṱhanu vho lungulwa nga matsheloni a Lavhuvhili, ḽa fumi-raru, hone muthihi we avha o sala o ḓou lungulwa nga masiari a ḓuvha ḽeneḽo,” vha amba.

Vho Makhuvha vhari tshikolo tshi na vhagudiswa vha 231, hone vhunzhi havho vha ḽa zwiḽiwa zwine zwa bikiwa tshikoloni. “Vha muhasho wa mutakalo vho dalela tshikolo tshashu vha ṱola zwoṱhe pherani yau bikela, mashudu mavhuya vha wana zwithu zwoṱhe zwo dzudzanyea. Ari koni u humbulela uri hu ngavha hu zwiḽiwa zwe zwa bikiwa tshikoloni, fhedzi ri humbulela masimba maswa e a thoma u rengiswa nga Musumbuluwo,” vha engedza.

Zwa zwino vharengisi vha malo vho imiswa u rengisa kha tshikolo itsho. Ṱhoho ya tshikolo vhari vha ḓo vha humisela kha fhethu havho hau rengisa nga murahu hau wana tshivhangi tsha tshiwo itshi. Muṅwe wa vharengisi tshikoloni itsho vhane vha rengisa zwiḽiwa zwa u fhambana, vhari vho thoma u rengisa masimba ayo ubva nwaha wo fhiraho. “Ahuna muthu ane ono vhuya a ḓa kha nne atshi vhilaela nga ha u vhaisala nga uḽa masimba ayo. Ndi kale ri tshi rengisa masimba aya, hone ri a renga kha vhengele ḽi fulufheleaho Thohoyanḓou. Nga Musumbuluwo, vhagudiswa vho ḽa khovhe yo bikwa tshikoloni vha ḓou thoma u lila nga upfa vhuṱungu, Ndi humbulela uri hu ngavha hu khovhe iyo ye ya bikwa tshikoloni,” vha amba.

Muambeli wa muhasho wa mutakalo Limpopo, Vho Neil Shikwambana, vho khwaṱhisedza tshiwo itshi, vhari vhagudiswa vho iswa vhuongeloni vhe na mbilaelo dzau fhambana, u fana na u humisa zwiliwa, u pfa u vhavha thumbuni, u rithea dangani na mikulo yo zwimbaho. Mapholisa vha Tshaulu vho vula mulandu wau ṱoḓisisa zwe zwa itea, hone vha khou bvela phanḓa na ṱhoḓisiso.

Date:16 February 2024

By: Maanda Bele

Maanda  Bele, born and raised in Nzhelele Siloam, studied journalism at the Tshwane University of Technology.

He is passionate about current news and international affairs.

He worked as part of the Zoutnet team as an intern in 2017.

He is currently a freelance journalist specialising in news from the Vhembe district.

Read: 186