Vhadzulapo vhari a vha ngaḓo dzhenelela kha khetho vha sa athu u thuswa

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Vho ramabindu na vharengi kha tshivhindini tsha Ṱhohoyanḓou vhari a vha ngaḓo dzhenelela dzi khetho nwaha uno arali vha masipala wa tshiṱiriki tsha Vhembe vha balelwa u lugisa phaiphi dza malaṱwa dzo tshinyalaho kha vhupo uho. Vhari phaiphi idzi dzi na minwedzi dzo tshinyala fhedzi vha masipala vha khou kundelwa u lugisa phaiphi idzo. Phaiphi idzo dzi tshimbidza malaṱwa a vhathu ane zwa zwino a ḓisa lwefha lu sa konḓelelei afho. Izwi zwoṱhe zwi ṱuwisa vharengisa kha mabindu a vhoramabindu na ndozwo kha vhoramabindu.

Zwa zwino ho phamuwa phaiphi kha mafhande a tsini na FNB, hune havha na maḓuvha a fumi malaṱwa a tshi elela asa imi. Munwe wa vhathu vhane vharengisa afho vhane vha bika nau rengisa zwiḽiwa tsini na mafhande ayo vhari u phamuwa ha phaiphi idzi zwo kwama mabindu avho nga nḓila isi yavhuḓi. “Ri fhethu husi havhuḓi na luthihi. Ari koni nau fema zwavhuḓi nga nṱhani ha lwefha ulu, zwine zwavha khombo kha mitakalo yashu. Lwa maḓuvha a fumi rovha ri si na bindu ḽine ḽa khou tshimbila zwavhuḓi, hovha hu si na vhathu vhane vha ṱoḓa u renga zwiliwa tsini na phaiphi dza malaṱwa dzi bvuḓaho. Naho ro ṱahisa mbilaelo dzashu kha vha masipala, ahuna thandululo ye ya swika kha rine,” vha amba.

Muṅwe wa vharengisi vhe vha hana u bulwa dzina, vhari vho kombetshedzea u vala bindu lavho kau bika nga u pfa lwefha lwe lwavha lu khou tambudza vharengi navho sa ramabindu. “Azwi tsha konḓelelea. Ndi kale phaiphi idzi dzi tshi tshinyala, fhedzi zwa zwino dzo tshinyala lwe vha fhedza tshifhinga tshilapfu vha sa lugisi. Hafha fhethu asi kule na masipala, lune vhovha vha khou tea u rumela vhathu vha ḓa u lugisa nga tshihaḓu. Ro badela mithelo yashu, fhedzi ahuna zwine ra wana murahu. Nḓila ya khwine ya tandulula iyi thaidzo ndi u khetha vhaṅwe vhathu vhane vha ḓovha vhavhusi vha masipala uyu. Zwa zwino ri ṱoḓa u shumisa khetho u ṱahisa mbilaelo dzashu,” vha amba.

Muambeli wa masipala wa tshiṱiriki tsha Vhembe, Vho Matodzi Ralushai, vho tenda uri vha na khaedu malugana na phaiphi dza malaṱwa tshivhindini tsha ḓorobo ya Ṱhohoyanḓou. “Zwishumiswa zwashu ndi zwiṱuku lune azwi koni u imedzana na tshumelo yashu. Ndi yone khaedu ine ravha nayo hone ndi tshone tshivhangi tsha u phamuwa ha phaiphi idzi tshifhinga tshoṱhe. Zwa zwino ho tholiwa vho rakonṱiraka uri vha lugise izwi zwoṱhe. Iyi ndi khaedu ine ya fanela u imiswa nga tshihaḓu lwa tshoṱhe,” vha amba.

Date:23 February 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019.

Read: 239