Zwiito zwa tshanḓanguvho zwo lozwisa muofisiri mushumo

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.

Musedzulusi wa kale vhare na vhuṱumanyi na tshiṱitshi tsha mapholisa tsha Thohoyanḓou a vhango xetshelwa nga mushumo fhedzi, vho dovha hafhu vha hweswa mulandu wa vhufhura ngau ngalangadza dokhethe he vha badelwa masheleni a tshigidi tshithihi na maḓana maṱanu a dzi rannda.

Musedzulusi wa kale Vho Tshifhiwa Muvhango (41) vho gwevhiwa malugana na zwiito zwa tshanḓa nguvhoni nga vha khothe ya ridzhini ya Bulugwane nga Musumbuluwo wa ḽa fumi-na-mbili Luhuhi. Mulandu uyu ndi une wa khou tutuwa ubva kha tshiwo tshe tsha bvelela nga ṅwaha wa gidimbili fumi-rathi nga ḽa fumi-rathi Ṱhafamuhwe musi vha tshi dzhia dokhethe ya mulandu we wavha u khou sedzuluswa nga mushumisani wavho. Nga murahu ha u dzhia dokhethe iyo, vho ḓou ṱangana na muthu we avha o farelwa u reila o ṅwa halwa lwo kalulaho he vha ṱoḓa u badelwa masheleni a tshigidi tshithi na maḓana maṱanu a dzi rannda uri vha ngalangadze mulandu.

“Mashudu mavhi kha Vho Muvhango, zwithu a zwongo tshimbila nga nḓila ye vha lavhelela ngayo, hone nga tshihaḓu munna uyo a ḓou vhiga mulandu kha vha tsedzuluso ya tshanḓanguvhoni na vhufhura ya Bulugwane. Ho ḓou thoma ṱhoḓisiso dza tshidzumbe, he vha farwa nga tshihaḓu vha tshi bva u ṱanganedza masheleni ayo a tshanḓa nguvhoni,” muambeli wa Hawks Limpopo Vho Lt Col Matimba Maluleke vha amba. Vho Maluleke vho engedza uri nga murahu ha uḓi vhonadza khothe lwa tshivhalo, Vho Muvhango vho ḓou lunguliwa nga beiḽi. Duvha ḽavho ḽa u gwevhiwa ḽo fhiriselwa phanḓa uya kha ḽa iṋa Ṱhafamuhwe 2024.

Thoho ya Hawks fhano Limpopo Vho Major General Gopz Govender vho ṱanganedza nau fhululedza tshigwada tsha vhaofisiri vhe vha shuma kha mulandu uyu. “Ri tama uri vhadzulapo vha zwi ḓivhe uri zwiito zwa tshanḓa nguvhoni na vhufhura a zwi ngaḓo tendelwa hone vha ḓo shuma nazwo hu si na u imelela kana u khethulula vhathu,” vha amba.

Muṅwe wa vhathu vhe vha takalela u tandululwa ha mulandu uyu ndi Vho Thelma Marole, vhane vhavha muṅwaleli wa Vhembe United Group, tshiimiswa tshi si tsha muvhuso tshe tsha vhumbiwa nga zwigwada zwine zwa lwa na vhugevhenga na u tambudzana ha mbeu. “Hu na vhaofisiri vha mulayo vhanzhi vhane vha khou shuma mushumo wavhuḓi kha u lwa na vhugevhenga, fhedzi vhane vha ri humisela murahu ndi vhaofisiri vha fanaho na Vho Muvhango vhane vha shuma nga vhufhura na zwiito zwa tshanḓa nguvhoni na u ima kha sia ḽine ḽa lwa na mulayo. Ndi vhone vhane vha shuma na mavemu, zwine zwa nanisa vhugevhenga kha vhupo hashu,” vha amba.

Date:23 February 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019.

Read: 247