Mupondi o gwevhiwa minwaha ya fumbili dzhele

Tshiṱori nga: Silas Nduvheni. Ṱhalutshedzo nga: Khathutshelo Raliphaswa.

Munna wa minwaha ya furaru-sumbe, Thendo Brian Mukwevho, o gwevhiwa u dzula dzhele lwa minwaha ya fumbili kha bulayo ḽa mufunwa wawe, Serinah Makhura, we a mu vhulaha nga ṅwaha wa 2017 nga ḽa iṋa Ṱhafamuhwe, ngei kusini kwa Mangondi.

Muambeli wa khoro ya vhutshutshisi ya lushaka fhano Limpopo Vho Mashudu Malabi-Dzhangi, vhari muhumbulelwa o hana mulandu khothe. Fhedzi naho zworalo vhuṱanzi vhune havha hone vhua fusha. Mutshutshisi muhulwane wa lushaka Vho Ndiitwani Mutangwa vho rangaphanḓa vhuṱanzi he ha ḓiswa nga mukomana wa mupondiwa na vhana vhawe, vhe vhari munna uyo ovha atshi tambudza Serinah.

“Vhana avho vho vhudza khothe uri vha ṱuwa hayani havho Tswinga vha ya ha mmemuhulu wavho ngei Mangondi sa izwi mme avho vhovha vha khou pfa vha songo tsireledzesa hayani havho. Nga madekwana, vho ḓou pfa nyambedzano vhukati ha mupondi na mme avho. Kha nyambedzano iyo, ho ḓou vuwa khuḓano ya maipfi. Vho ḓou pfa Vho Serinah vha tshi bula maipfi auri ‘aningaḓo mmbulaha’. Nga ḓuvha ḽi tevhelaho, Vho Serinah vho ḓou ṱangana na mupondi wavho wea ḓou vha ṱhasela a fhedza nga u vha ṱhavha u swika vha tshi lovha. Vho ḓou waniwa nga ṅwananyana wavho vhe na mafuvhalo au ṱhavhiwa kha khana,” vha amba.

U engedza tshileme kha tshigwevho, khothe yo ḓou vhidza Vhamusanda vha Tswinga, Vho Mmbangiseni Tshishonga, vhe vha vhudza khothe uri muvhundu wavho au imi na zwiito zwa mupondi kana zwa u tambudzana ha mbeu. Vhamusanda Vho Tshishonga vho ḓou bvela phanḓa nau vhudza khothe uri vha khou thusa vhana vha mufu vhararu nga u vha wanela thuso yo teaho. Vho vhina nga u humbela khothe uri vha hwese mupondi tshigwevho kha zwiito izwi zwe zwa sia vhana vhe zwisiwana.

Mutshutshisi vho amba uri ahuna zwine zwa imelela zwiito izwi lune mupondi anga wana tshigwevho tshiṱuku, izwi ndi ngauri mupondi hango sumbedza upfa vhuṱuku kana u vhavhalela mupondiwa wawe. Khothe vho fhedza nga u gwevha mupondi uyo u dzula dzhele lwa minwaha ya fumbili.

Nga murahu tsengo, Vhamusanda Vho Tshishonga vho vhudza vha nyanḓadza mafhungo uri vhana avho vhararu vha khou vhothogomelwa nga vhadzulapo. “Zwa zwino ndo vha ṋea mavu ane vha ḓo fhaṱelwa nnḓu ya RDP,” vha amba.

Date:23 February 2024

By: Silas Nduvheni

Read: 228