Ho ḓadzwa mativha a Phiphidi

Tshiṱori nga: Kaizer Nengovhela . Ṱhalutshedzo nga: Khathutshelo Raliphaswa.

Murangaphanḓa wa sialala muswa, Vhamusanda Vho Takalani Dion Tshivhase, vho ḓadza mativha a Phiphidi kha vhuṱambo he ha farwa nga Mugivhela wa ḽa rathi Lambamai.

Muvhundu uyu wovha u na minwaha miṋa vha si na murangaphanda wa sialala, zwe zwa ita uri vhadzulapo vha Phiphidi vha ḓale nga dakalo kha vhuṱambo uhu ha u ḓadza mativha nga Vhamusanda muswa. Vhamusanda vho neiwa dzina ḽa musanda ḽa “Mphathiseni Dumbutshena” nga ḓuvha iḽo ḽine vha ḓo rwelwatari ngalo.

Nga ḓuvha ḽa vhuṱambo, Vhomakhadzi Vho Ndihone Tshimangadzo Tshivhase vho ṱahisa zwauri lwa minwaha miṋa vha si na Vhamusanda hovha hu tshi pfala sa fhethu hure na gole ḽitswu ḽine zwa zwino ḽo tsiruwa. Vho ita khuwelelo kha vhaṅwe vharangaphanḓa na khoro ya musanda ya Vhamusanda Vho Mphathiseni Dumbutsheana uri vha shume zwavhuḓi na murangaphanḓa wavho muswa. “Vhurangaphanḓa a vhungo leluwa u fana na zwine vhathu vha humbula zwone. Vha fanela u shuma vha sa neti vha tshi itela vhalanda vhavho,” vha amba.

Vho ombedzela kha ḽauri Vhamusanda Vho Mphathiseni Dumbutshena vha fanela u farana zwanḓa na zwiṅwe zwiimiswa uri vha kone u ḓisela muvhundu wa Phiphidi tshumelo ya khwine. “Uyu mushumo asi une wa tamisa nga mishumo yawo. Muri wo ṱavhiwaho namusi ndi muri wa tshitshavha; u fanela u aluwa wo khwaṱha u itela mbuyelo ya vhadzulapo,” vha engedza.

Vhomakhadzi Tshivhase vho eletshedza vhadzulapo uri vha ṱhonifhe vhuimo ha vharangaphanḓa vha sialala uri zwithu zwoṱhe zwi dzule zwi ngonani. Vho amba nga ha vhundeme ha u thivhela dzi khuḓano na usa pfesesana, he vha ṱuṱuwedza murangaphanḓa muswa uri vha shume vho ḓi imisela, vha dovha hafhu vha vha sumbedzisa nga ha khombo dza uvha na maanḓa e vha hweswa one sa murangaphanḓa wa tshitshavha.

Vha tshi fhindula, Vhamusanda Tshivhase vho amba na vhadzulapo vhe vhavha vhe hone kha guvhangano kana vhuṱambo uhu, he vhari u ḓadza havho mativha zwi amba mathoma a zwithu zwiswa kha vhadzulapo vha Phiphidi. “Ri fanela uvha na maga ane ra a dzhia u khwinifhadza muvhundu washu, hone zwine zwa ri takadza ndiuri ri na zwithu zwine vhathu vha zwi ṱhoga ḓuvha ḽiṅwe na ḽiṅwe u fana na maḓi na muḓagasi. Ndi ḓo tevhela kha maga e mune wanga vha tshimbila one, hone ndi ḓo ṱhogomela vhalanda vhanga,” vha zwa.

Date:19 April 2024

By: Kaizer Nengovhela

Kaizer Nengovhela started writing stories for Limpopo Mirror in 2000. Prior to that he had a five year stint at Phala-Phala FM as sports presenter. In 2005 Kaizer received an award from the province's premier as Best Sports Presenter. The same year he was also nominated as Best Sports Reporter by the Makhado Municipality. Kaizer was awarded the Mathatha Tsedu award in 2014.

Read: 107