Neḓorobo vha kale vha Tshwane, Dr Murunwa Makwarela, vho fhira fhano shangoni.

Tshiṱori nga: Victor Mukwevho. Ṱhalutshedzo nga: Khathutshelo Raliphaswa.

Neḓorobo vha kale vha masipala wa Tshwane, Dr Murunwa Makwarela, vho fhira shangoni nga matsheloni a Ḽavhuvhili ḽa fumbili-raru Lambamai. Vho Makwarela vhevhavha vhatshidzula vhupo ha Vhembe he vha aluwa kusini kwa Tshitereke, tsini na vhuongelo ha Donald Fraser.

Vho Makwarela vho bebwa ngei Cullian, Pretoria nga ṅwaha wa gidiḓaṱahe fusumbe-mbili, Vho ḓou aluwa kusini kwa Tshitereke, hone vhutshilo havho musi vha khou aluwa ndi he havha ho simiwa kha muvhundu wavho zwe zwa shela mulenzhe kha vhutshilo havho na nḓila dze vha dzhia kha vhutshilo.

Vha tshi amba kha radio ya lushaka nga Lavhuvhili kha mbekanyamushumo ya nga madekwana, muambeli wa muṱa, Vho Abel Dube vho amba zwauri Vho Makwarela vho lovhela vhuongeloni ha Leratong ngei Krugersdorp nga murahu ha vhulwadze ha tshifhinga tshiṱuku he husi bulwe dzina. Musi vha tshi vhudziswa arali Vho Makwarela vhovha vha khou vhaisala, Vho Dube vho amba ḽauri musi Vho Makwarela vha tshi khou rera tshivhidzoni nga matsheloni a Sondaha, vho amba zwauri avha khou ḓipfa zwavhuḓi.

”Nga Musumbuluwo, vhovha vha khou vuwa zwavhuḓi, fhedzi nga masiarai vho ḓou amba zwauri avha ḓipfi zwavhuḓi. Ndi he vha gidimiselwa vhuongeloni he vha dzula hone vhusiku hoṱhe. Vho ḓou lovha nga awara dza matsheloni a Ḽavhuvhili,” vha amba.

Vho Dube vhari Vho Makwarela vhovha vhe muthu a rangaho vhathu phanḓa nga tsumbo, na kha tshivhidzo tshavho. Vho vha ṱalusa sa munna vhe vhavha vha tshi funa mudzimu na vhathu khathihi na u vha ṱhonifha. “Vha ḓo humbulwa sa muthu vhe vhavha vhe na ngoho nau ita zwithu nga ngona zwifhinga zwoṱhe. Fhedzi zwa zwino sa muṱa, ri tama u neiwa tshifhinga tshau lilela muṅwe washu,” vha amba.

Vho Makwarela, mukhantselara wa dzangano ḽa Cope, vhovha neḓorobo vha masipala wa Tshwane nga nwedzi wa Luhuhi gidimbili fumbili-raru, zwi tshi tevhela u notha ha Vho Randall Williams. Vho khethwa nga vha dzangano ḽa ANC na EFF, he vha kunda mukhethiwa wa dzangano ḽa DA Vho Cilliers Brink kha khetho idzo.

Vho dzhena gudedzini ḽa Yunivesithi ya Venda, he vha ṱhaphudza pfunzo dzavho kha bachelor of science in botany & zoology nga ṅwaha wa gidiḓaṱahe fuṱahe-ina. Lufuno lwavho lwa zwa saintsi zwo vha swikisa kha gudedzi ḽa Yunivesithi ya Natal, Durban, he vha ṱhaphudza pfunzo dzavho vha vhuya na ṱhanziela ya honours in plant biotechnology nga ṅwaha wa gidiḓaṱahe fuṱahe-ṱhanu. Nga ṅwaha wa gidiḓaṱahe vho inga nga ṱhanziela ya Masters of Science.

Nga ṅwaha wa gidimbili-rathi, vho ḓou wana ṱhanziela ya vhudokotela ubva kha gudedzi ḽa Yunivesithi ya Witswatersrand. Musi vhe kha ngudo dzavho dza vhudokotela uho, Vho Makwarela vho ita ṱhoḓisiso dzavho kha tshiimiswa tsha Donald Danforth Plant Science ire ngei Missouri, United States.

Nga ṅwaha wa gidimbili-ṱhanu, Vho Makwarela vho ḓou itwa murangaphanḓa kha khoro ya tsedzuluso dza zwa vhulimi. Nḓivho yavho kha zwa biotechnology na mbonela phanḓa yavho kha zwa vhulimi zwo tou sumbedzea tshoṱhe kha mishumo yavho, he vhavha vhe na vhuḓifhinduleli hau vhulunga nau shumisa zwimedzwa hu tshi shumiswa zwishumiswa zwa vhupo hone hune.

Vho Makwarela vho sia mufumakadzi wavho na vhananyana vhavhili. Mbulungo yavho yo farwa nga Sondaha ya la fumbili-malo kusini kwa Tshitereke.

Date:29 April 2024

By: Victor Mukwevho

Victor Mukwevho Ne-vumbani joined the Mirror during it's inception in 1990. He joined the SABC newsroom in 1995, and was known by  listeners as "A u fhedzisela ari". He was a news editor for The Tembisan Newspaper from 2007 to 2015. He rejoined the Limpopo Mirror newspaper in June 2022 as a freelance journalist.

Read: 122