Munna we a vhulaha mufunwa wawe oḓi isa mapholisa.

Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa

Munna wa minwaha ya furaru-raru, we avha a khou zwimiwa nga mapholisa nga murahu hau ṱhavha mufunwa wawe a lovha, Rinah Malange, o ḓi isa mapholisani a tshiṱitshi tsha Tshilwavhusiku nga mathabama a Lavhuraru ḽino. Rinah ovha e na minwaha ya furaru.

Uya nga muambeli wa mapholisa a Limpopo, Brigadier Hlulani Mashaba, vhari mapholisa vho wana muvhigo wauri mufumakadzi uyo, Rinah a bvaho Madodonga, o ṱhavhiwa a lovha nda tshihali tshifhiraho. Rinah o waniwa o edela kha tivha ḽa malofha ngomu lufherani lwawe lwau edela. Ovha e na mafuvhalo au ṱhavhiwa kha mirado ya nṱha ya muvhili nga matsheloni a ḽa fumbili-sumbe Lambamai.

Ṱhoḓisiso thangeli dzo sumbedzisa zwauri Rinah o ṱhavhiwa nga tshihali, a dovha hafhu a rwiwa lwa tshivhalo nga tshihali, nga munna uyo we a fhedza ngau shavha he tshiwo tsha itea hone. Munna uyo ane a vhidzwa Hulisani Liphaswa ovha  a khou bva u lungululwa nga masheleni andatiso nga duvha ḽa mulovha ha tshiwo, 26 Lambamai. Ovha o farelwa u tshipa nau lingedza u vhulaha, hone zwa zwino ndi muhumbulelwa kha bulayo la Rinah.

Uya nga we a luma vha Limpopo Mirror ndevhe ane ovha a tsinisa na mufu, Rinah na Hulisani vhovha vha tshi dzula vhoṱhe sa vhafarisi hone vhovha vhe na ṅwana muthihi vhoṱhe. Vhafunani avho vhovha na tsemano i lemelaho nga madekwana a ḽa fumbili-rathi.

Mmane wa Rinah, Vho Ntshengedzeni Mabudu, vhari lufu lwa Rinah lwo sia muṱa vho bulifhala zwihulu. “Rovha ri tshi ḓi zwipfa uri vhafunani avha vhavhili vhovha vhe na dzi phambano,” vha amba. Vho engedza zwauri mbingano iyo yovha yo ḓala zwiito zwau tambudzana he Rinah ovha a tshi tshila sa phuli muḓini wawe. “Rinah hango vhuya abva o takala kha mbingano yawe, ovha e phuli lune ovha asa ḓifhelwi nga vhutshilo hawe, ṅwananga o tambula u swika ḓuvha ḽawe ḽau fhedza fhano shangoni,” vha amba.

Vho Mabudu vho dovha hafhu vha tahisa u vhilaela havho, nga murahu ha tshiwo, ahuna na muraḓo na muthihi wa muṱa we avha vhigela tshiwo itshi. Sa muṱa vho tou pfa nga vhahura nga murahu vha vhudzwa nga mapholisa. “Ro vhaisala vhukuma sa izwi ri sa ḓivhi uri ho itea mini kha ṅwana washu na vhana vhawe,” vha amba.

Rinah u ḓo vhulungiwa nga Mugivhela mavhidani a Hamadodonga. Tshumelo iḓo thoma nga awara ya rathi nga matsheloni.

Nga tshifhinga tsha u ṅwaliwa ha tshiṱori itshi, Hulisani ovha o vhetshelwa uya uḓi vhonadza khothe ha madzhisiṱiraṱa wa Tshilwavhusiku.

Date:06 May 2024

By: Khathutshelo Raliphaswa

Khathutshelo Prudence Raliphaswa started her journey in the media industry by studying Media Consultancy at Boston College in 2018. She continued her studies in journalism at IIE Rosebank College and graduated in 2022. Her passion is to be creative with words and tell stories in a more detailed way. She started as an intern at Limpopo Mirror in 2023 and is primarily responsible for the translations into Tshivenda..

Read: 241