Nangoho, Mia Muofhe vho tou vhulawa.

Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa

U vhuya ha mvelelo dza tshivhangi tsha lufu lwa Lindelani Nengovhela we avha a tshi ḓivhiwa khwine nga ḽa Mia Muofhe zwo swika sa tshimangadzo kha vhathu vhanzhi. Mia Muofhe vho lovha nga tshipfudamuya. Izwi zwo itea nga maḓautsha a ḽa fumbili-malo Phando ṅwaha wo fhiraho. Tshitumbu tshavho tsho ḓou waniwa ngomu ha mulonga wa bunga wa nnḓa wo ḓalaho nga maḓi nga matsheloni a ḓuvha iḽo.

Izwi ndi zwine Muvhuso wa tenda uri zwo itea muḓini wa Mia Muofhe ngei Mangondi Sidou, nnḓa nyana ha Thohoyanḓou. Muvhuso u khou dzhia tsheo wo sedza na mvelelo dza DNA dze dza itwa u vhona tshivhangi tsha u lovha ha Mia Muofhe dze dza vhuya vhege yo fhiraho. Mulangi wa vhutshuthsisi ha lushaka (DPP) vha dovha hafhu vha tenda zwauri muthu ane a fanela u hweswa mulandu wa bulayo ḽa Mia Muofhe ndi mufarisi wavho Vho Livhuwani Madadzhe (39).

Vho Madadzhe, vhane vha ḓivhea khwine nga ḽa ramiswaswo SABC Livhu, vho fariwa hu sa athu u fhela awara nnzhi nga murahu hau wanala ha tshitumbu tsha Mia Muofhe. Nga vhusiku ha ḽa fumbili-sumbe Phando, Vho Madadzhe na mufumakadzi wavho vhovha na tshimima tshau pembela vhe na khonani dzavho. Vhovha vho ḓalelwa nga dakalo vhusiku uho nga murahu ha u phumulwa ha mulandu wau tambudza we wavha wo vulwa nga Mia Muofhe vha tshi vulela Vho Madadzhe.

Nga murahu ha tshimima, khonani idzo dzo ḓou swielelwa nḓuni khulwane uri vha eḓele hone, ngeno Vho Madadzhe na Mia Muofhe vho eḓela kha nnḓu ya phera mmbili ire murahu ha nnḓu khulwane. Vhusiku honoho, Vho Madadzhe vho ḓou luma nḓevhe khonani dzavho uri Mia Muofhe avha khou wanala fhethu, vho ngalangala. Vho ḓou ya mapholisani u vula mulandu wa muthu o ngalangalaho tshiṱitshini tsha mapholisa tsha Ṱhohoyandou nga matsheloni. Hu sa athu u fhela awara dzine dza swika dza fumi, tshitumbu tsha Mia Muofhe tsho ḓou waniwa ngomu ha mulonga wa bunga ḽa nnḓa ḽo ḓalaho maḓi hanefho muḓini wavho. Zwi tshi tevhela u wanala ha tshitumbu tsha Mia Muofhe, Vho Madadzhe vho ḓou fariwa na zwenezwo, hone vha ḓi vhonadza na khothe. U bva ḓuvha iḽo ḽe vha fariwa ngalo, Vho Madadzhe vho noḓi vhonadza khothe lwa tshivhalo he vha swika khau wana beiḽi ya masheleni a swikaho zwigidi zwa fuṱhanu wa dzi rannda nga nwedzi wa Lambamai nwaha wo faho.

U ḓivhadzwa zwauri Vho Madadzhe vha ḓo senga kha mulandu uyu vha tshi sengiselwa u vhulaha zwo ḓa sa tshimangadzo kha Vho Madadzhe. Nga Lavhuṱanu ḽa raru Shundunthule, Vho Madadzhe vhoḓi vhonadza phanḓa ha madzhisiṱiraṱa wa Ṱhohoyanḓou. Vha sa athu uḓi vhonadza nga Lavhuṱanu iḽo, vhathu vhanzhi vhovha vhe na u humbula zwauri mulandu wavho uḓo phumulwa vha vhofhololwa.

Musi Vho Madadzhe vha tshi ḓi vhonadza khothe nga ḽa fumbuli-ṱahe Lambamai ṅwaha uno, vho vhonala vhe muthu are na fulufhelo ḽauri zwithu zwiḓo tshimbila nga nḓila yavhuḓi khavho. Muimeleli wavho, Adv Ntsako Hlungwane, vho humbela uri mulandu wa Vho Madadzhe u phumulwe. Nga tshifhinga itsho, hovha na u lenga ha u wana mvelele dza DNA na u ṱola tshivhangi tsha lufu, zwa sia vha DPP vha si na maanḓa manzhi au dzhia tsheo yau sengisa Vho Madadzhe kana u phumula mulandu. Mvelelo dzau fhedza dzo ḓou tendala Muvhuso utshi wana zwidodombedzwa zwa vhuṱhogwa zwo fanelaho.

Dakalo kana fulufhelo ḽa Vho Madadzhe ḽo fhela tshoṱhe nga Lavhuṱanu musi hu tshi ḓivhadzwa u vhuya ha mvelelo nauri vha DPP vho dzhia tsheo yau sengisa Vho Madadzhe. Vho Madadzhe vha khou hweswa mulandu wau vhulaha nau ṱoḓa u kunda vhulamukanyi na tshanḓa tsha mulayo nga uvha posa ngomu mulongani wa bunga. Tsengo yavho yo vhetshelwa maḓuvha a ubva ḽa fumi-rathi u swika fumbili Khubvumedzi ṅwaha uno khothe khulwane ya Ṱhohoyanḓou.

Tsheo ya vha DPP yo sia vhathu vhanzhi vho rulea sa izwi vhovha vho lindela u pfa nga ha mulandu uyu. Vha muṱa wa mufu Mia Muofhe vhari aya ndi mafhungo avhuḓi e vha apfa ubva ḓuvha ḽe mulandu uyu wa thoma u sengiwa khothe.

Mmemuhulu wa Mia Muofhe, Vho Elsie Nengovhela, vhari vha pfa vha khou livhuwa khothe kha tsheo iyi ye ya dzhiiwa. “Ndovha ndi tshi tou pfa unga ndi muḽoro. Lwovha lwendo lulapfu vhukuma. Ri tshi bva ri tsi dzhena khothe lunzhi, husina zwine zwa ambiwa nga hau senga. Ro ṱoḓa u laṱa fulufhelo hone zwinwe zwifhinga ri tshi pfa unga vho furalela mulandu uyu wa bulayo ḽa nwana washu. Ro takala vhukuma uri na ngoho tsengo yo vhetshelwa ḓuvha hone ri fulufhela uri ri ḓo wana vhulamukanyi,” vha amba.

Date:10 May 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019.

Read: 140