Tshigwada tsha Faith of Our Fathers vha do mbvumbvusa vhathu kha Phalaphala Gospel Festival

Tshiṱori nga: Elmon Tshikhudo. Ṱhalutshedzo nga Khathutshelo Raliphaswa.

Lwa minwaha ya tshivhalo, tshigwada tsha muzika wa gospel, Faith of Our Fathers Quartet, vhovha vha tshi ḓivhelwa u tevhela nga murahu ha vhaṅwe vhoramuzika. Kha vhuṱambo vhuhulwane, madzina avho ovha atshi bvisiwa kha mitevhe ya mbekanyamushumo idzo, hone na zwifanyiso zwavho zwi sa anḓadzwi na zwa vhaṅwe vhoramuzika kha khunguwedzo dzine dza anḓadzwa. Zworalo, ṅwaha uno u ta tshanduko ya vhuṱhogwa hone ya khwine sa izwi vhe vhaṅwe vha vhambvumbvusi kha bepha ḽa Phalaphala FM Gospel Festival, ḽine ḽa ḓo rangela Royal Heritage Festival ino vhege nga Lavhuṱanu.

Tshigwada itsho tsha miraḓo miṋa, hune vhoṱhe vhavha miraḓo ya tshivhidzo tsha Seventh Day Adventist Church, vha ḓo mbvumbvusa vhathu luvhanḓeni fhaḽa Agape City ire vhuponi ha Vuwani nga ḽa fumi-raru Khubvumedzi. Mulisa Tshifaro, muthihi wa tshigwada itsho, o ṱahisa nga ha dakalo ḽavho nga khauri vha ḓo mbvumbvusa vhathu kha bepha iḽi. “Ndi kale ro ḽi lindela heḽi ḓuvha uri ḽi swike. Ndi tshikhala tshau bveledza nau sumbedzisa vhukoni hashu kha vhathu. Ro takala vhukuma uri dzina ḽashu lovha ḽi kha khunguwedzo zwa zwino. Na miraḓo ya kereke yashu vho ri takalela vhukuma kha zwine zwa khou itea, hone vho ri fulufhedzisa uri vha ḓoḓa nga vhunzhi uri vhari tikedze nga heḽi ḓuvha, hone ri livhuwa mudzimu nga zwenezwo.” Vha amba.

Vho Tshifaro vho ṱahisa zwauri vhatevheli vhafuni vha tshigwada tshavho vha nga lavhelela u mbvumbvuswa luvhanḓeni nga nyimbo dzine vha dzi funesa. “Ri ḓo mbvumbvusa vhathu nga nyimbo dzashu dza kale na ntswa ubva kha aḽibamu yashu ine yavha ya vhuṋa, ine ya ḓo bva husi kale. Ha ḓa muthihi, ahu ḓe vhoṱhe, nga vhaḓe vhavhe tshipiḓa tshashu kha vhusiku havhuḓi hau hulisa nau renda Mudzimu,” vha engedza.

Tshigwada itshi tsho vhumbiwa nga ṅwaha wa 2015 musi ṱhama nṋa – Vho Rembuluwani Ramugondo (bass), Orifha Raligidima (alto), Mashudu Mathoni (second tenor), na Mulisa Tshifaro (second tenor) – vha tshi dzhia tsheo yau vhumba tshigwada itshi ngau ṱanganyisa vhukoni havho. U mbvumbvusa vhathu havho hau thoma hovha kha bembela ḽa ḓuvha ḽa mabebo ya chaplain vhavho Vho Thanyani Mahamba nga ṅwaha wa 2015 nga ḽa 10 Shundunthule.

Vho ḓou anḓadza aḽibamu yavho yau thoma, ThamaThama ndi Murena, nga ṅwaha wa 2017, ye ya ḓou tevhelwa nga CD na DVD ye ya kanḓiswa vhathu vha tshi zwi vhona nga ṅwaha wa gidimbili fumi malo, ye ya kanḓisiwa Shayandima Worship House. Aḽibamu yavho ya vhuraru, Naa ndi Vho Nnyi, yo ḓou kanḓisiwa nga ṅwaha wa gidimbili fumbili-thihi.

Date:10 September 2024

By: Elmon Tshikhudo

Elmon Tshikhudo started off as a photographer. He developed an interest in writing and started submitting articles to local as well as national publications. He became part of the Limpopo Mirror family in 2005 and was a permanent part of the news team until 2019. He currently writes on a freelance basis, covering human rights issues, court news and entertainment.

Read: 93