Ndoro ya Mugidimi Tshinyadzo Mudau yo wedza.

Tshiṱori nga: Silas Nduvheni. Ṱhalutshedzo nga: Khathuthutshelo Raliphaswa.

Hovha ho ḓala dzi khuwa, mifhululo na zwililo zwa dakalo musi mugidimi wapo Tshinyadzo Mudau, a bvaho Tshidzini nnḓa nyana ha Ṱhohoyandou, a tshi netshedzwa tshipuga tsha mendele tshakhuliso tshau fhedza mbambe dza migidimo mihulwane u bva ṅwaha wa 2015 ngei Berlin, Germany, nga 2018 ngei London, United Kingdom, nga 2018 ngei Chicago, USA, nga 2019 ngei New York City, USA, a ḓivha hafhu nga 2019 ngei Boston, USA na ṅwaha uno ngei Tokyo, Japan.

Mudau wa minwaha ya fuṱhanu-iṋa, ndi muraḓo wa tshiimiswa tsha Faranani Athletics Club. Ndi ene muvenda wa u thoma u pfufhiwa nga tshiphuga itshi. Kha vhuṱambo hawe ha khuliso he ha farelwa kerekeni ya Discipline in Making Christian Church nga Mugivhela wa ḽa fumi-na-rathi Nyendavhusiku, hovha ho ḓala mashaka, dzi khonani, na vhaimeleli ofisi khulwane ya vhutshutshisi ha lushaka ngei Pretoria.

“Zwovha zwi zwavhuḓi hone ndo pfa ndo hulise sa izwi ndi muvenda wa u thoma u pfufhiwa tshiphuga itshi. Ndi muḽoro wa mugidimi munwe na munwe, hone ndi livhuwa mudzimu ndo kona u wedza ndoro yanga. Mukomana wanga Vho Albert, khaladzi anga Vho Peggy na mufumakadzi wanga ndi vhone vhathu vhane nda vha livhuwa zwihulu nga thikhedzo ye vha nṋea yone.

Vho Mudau vho engedza uri sa mugidimi, vha ḓi vhetshela ndivho dzine vha ṱoḓa u dzi swikelela, hone musi vha tshi swikelela ndivho idzo, vha ḓalelwa nga dakalo. “Lutamo lwanga ndi u ṱuṱuwedza vhanwe vhagidimi vha bvaho kha vunḓu ḽashu, uri vha zwi vhone uri azwina ndavha uri vha bva fhethu ha hani, zwine zwavha zwa vhuṱhogwa ndi zwine vhone vhane vha ḓi ṱoḓela kha vhutshilo. Arali muthu avha na vhuḓifulufheli, vha sedzani na ndivho yavho, vha nga kona u wedza ndoro dzavho, “ vha amba.

Mudau ovha e munwe wa vhagidimi vha paḓaho zwigidi zwa fuiṋa-ṱhanu u mona na ḽifhasi vhe vha dzhenelela mbambe ya 42.2km ngei Tokyo. O fhedza u gidima nga awara tharu na minete dza fumi-sumbe, zwe zwa mangadza vhathu sa izwi a mugidimi a bvaho vhuponi ha mahayani. Uri musi e kha mbambe iyo, ovha e na tshiphikwa tshithihi fhedzi muhumbuloni: u fhedza mbambe dzina ḽawe ḽa ṅwaliwa kha mbondo na vhanwe vhagidimi makone.

Ono gidima na mbambe ya Jerusalema ngei Israel, ya Dublin ngei Ireland, ya Paris ngei France na ya Rotterdam ngei Netherlands.

Date:20 December 2023

By: Silas Nduvheni

Read: 534