Tshiṱori nga Elmon Tshikhudo. Ṱhalutshedzo nga Khathutshelo Raliphaswa
Ramuzika vha ḓivheaho vha gospel Albert Mudau vhari u khethiwa havho kha pfufho dza Phalaphala FM Tshivenḓa Music Awards (TSHIMA) zwi touvha u wana gundo kale hone zwo vusuludza buḓo ḽavho ḽa muzika.
Lidzhakanḓila kha muzika, vhane vha miṅwaha ine ya hovhelela kha ya mahumi mavhili, vho khethiwa kha tshiteṅwa tsha ramuzika wa khwine wa gospel ya sialala. Vhuṱambo uho ha dzi pfufho vhu ḓo farwa fhaḽa Kalahari Waterfront nga ḽa sumbe Nyendavhusiku.
Iyi ndi khetho ya vhuvhili ya Vho Mudau ubva tshe havha na dzi TSHIMA. Lwa u thoma vho khethiwa nga 2012, fhedzi vha si wine.
Luimbo lwavho lwe lwa ita uri vha khethiwa, Wo Mpfuna Zwingafha, ndi luimbo luhulwane kha aḽibamu yavho ntswa, ine asi kale yo anḓadzwa. Aḽibamu iyo yo pfuma nga dzi nyimbo u fana na Tshililelwa Tshe Wa Bula, Dzi Nḓila Dzau Dzoṱhe, Fhungo li Nndifhelaho, Kha ri Takalele, na Mutshidzi Wanga.
Vha tshi vhudziswa uri vha ḓi pfa hani uvha vho khethiwa, Vho Mudau vho tou ṱavhanya u amba zwauri vhovha vho takala vhukuma uvha muṅwe wa vho nkhetheni kha tshiteṅwa itshi. "U nagwa hanga nga kha nyimbo yanga ndi zwine zwa amba zwihulu kha nṋe. Hezwi zwoṱhe zwi tou sumbedza zwauri mishumo yanga i khou vhonala kha nḓowetshumo ya muzika wa gospel. A zwingo leluwa u swika hune ndavha hone zwa zwino. Vhahaṱuli vho vhona zwinzhi kha nṋe, hone ndia tenda zwauri hu na zwinzhi zwine zwa khou ḓa zwine zwa ḓo ita uri ndi vhonale u fhira hafha," vha amba.
"Ndo shumesa lwa miṅwaha minzhi. Ndi na dzi aḽibamu dza fumi-thihi, ndo katela na aḽibamu yanga ya zwino zwino ye ya ita uri ndi ḓi wane ndi muṅwe wa vho nkhetheni, zwine zwavha khuliso kha nṋe. Ndo ndo humbula u notha nga murahu ha heyi aḽibamu, fhedzi u nangwa hanga zwo vusuludza buḓo ḽanga. Ndi azwi vhona uri hu tshe na zwinzhi zwine nda ḓo ṋea vhathu. Ndi tenda zwauri hetshi ndi tshifhinga tshanga tshau kana zwe nda zwala miṅwaha yo fhiraho," vha amba.