Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Vhadzulapo vha Itsani na vha muṱa wa ha Mbumi, vho sala vhe na mbudziso dzi si na phindulo nga murahu hau fhiswa ha tshiṅwe tshipiḓa tsha nnḓu ya phera nṋa ine yavha ya Vho Khathutshelo Mbumi.
Mulilo wo ṋanga wa ṱaha nga awara dza nga maḓautsha a Lavhuṱanu ḽa ṱhanu Fulwana. Vho Mbumi vha minwaha ya furaru, vhane vha dzula vhe vhoṱhe vhovha vhe mushumoni nga madekwana nga tshifhinga tshau ṱaha ha mulilo. Vho Mbumi vha shuma sa mupaki kha ḽiṅwe ḽa mavhengele mahulwane Ṱhohoyandou.
"Ndo dzima ṱhingokhwala yanga musi ndi mushumoni, fhedzi ndari ndi tshi vhuya nga awara ya vhuṱanu nga maḓautsha, nda wana yo ḓala yo inga nga milaedza vhathu vha tshi mmbudza nga ha u swa ha nnḓu yanga. Ndo ḓou gidimela hayani na zwenezwo he nda wana vhadzulatsini na vha tshumelo dzau dzima mililo vha khou lingedza u dzima mulilo uyo," vha amba.
Vho Mbumi vho amba zwauri zwe zwa vha vhilaedza ndi musi vha zwidzima mulilo vhovha vha khou sola uri ho tou dzhena muthu a ita zwiito izwo. Izwi zwo khwaṱhisedza mbilaelo ya Vho Mbumi uri ho ḓi tou dzhena muthu a thoma mulilo uyo.
"Ndi muthu wa Mulalo na Lufuno hone athi vhoni uri ndi na maswina. Ndi khou kundelwa u pfesesa uri ndi nnyi ane a ngavha a khou ṱoḓa u ntshinyadzela. Mulilo wo thoma lufherani lwanga, zwine zwa amba uri muiti wazwo ovha a khou tou ṱoḓa nṋe muṋe," vha amba.
Vho Mbumi vho amba zwauri vho aluswa nga makhulu avho, Vho Alidzuli Mudau, nga murahu ha u lovha ha vhabebi minwaha yo fhira. "Zwezwi makhulu anga vha tshi aluwa, ndo ḓou kundelwa u vha ṱhogomela, nda vha humisela hayani hashu ha murahu kha ḽiṅwe shango, ḽa Mulenzhe. Ndi tshi amba zwa zwino heyi nnḓu asi yanga na nṋe," vha amba.
Tshiwo itshi tsho sasaladzwa nga vhurangaphanḓa muvhunduni uyo. Murangaphanḓa wa SANCO Itsani Thivhulawi, Vho Ntaka Mathoni vho amba zwauri tshiwo itshi tshi touvha zwiito zwa vhuaḓa na vhumbilummbi.