Nga murahu ha minwaha ya fumiiṋa yo fhela, vha (Ramahuma Brass Band) vha khaḓi isa phanḓa nau kovhela vhathu muzika u mvumvusaho une vha ḓivheliwa wone, vha tshi itela u mvumvusa vhatevheli vhavho.
Nga mugivhela wa dzi 25 February, vho mvumvusa vhathu sa zwine vha ḓivheliwa zwone musi vho dala ngei Maniini kha mushumo wa kereke. Vha tevheli vhavho vhane vha vha funesa vho sumbedza vho ḓala nga dakalo hone vho vha vha sa ṱoḓi vha bennde ya Ramahuma vha tshi ṱuwa.
Iyi bennde ya burasi yo thomiwa nga nwaha wa 2009, murangaphanḓa na mutumbuli wayo ndi Vho-Patrick Ramahuma. Iyi bennde ya vhaṱhannga vha 25 vhane vha dzula Ha-Ramantsha nnḓa ha ḓorobo ya Louis Tritchardt, vho novha vhaḓivhalea lwa minwaha lune mutambo uvha u songo fhelela musi vha siho.
U dzulela u takadza vhatevheli vhavho nga muzika asi tshone tshipikwa tshavho tshi tshoṱhe, vha dovha hafhu vha ṱoḓa u thusa u phulusa vhaswa kha uḓi dzhenisa kha zwa vhugevhenga nau vha thusa uḓi imisa nga vhoṱhe.
Vho-Ramahuma vhari zwoṱhe vho zwi thoma ngau takalela havho muzika wa burasi nau funa vhaswa vha vunḓu lavho. "Ndi muraḓo wa kereke ya Zion Christ Church (ZCC), hune burasi yavha khulwane kha dzi tshakatshaka dza muzika une vha lidza, he nda aluwa ndi tshi u thetshelesa hone nda u funa. Nga nwaha wa 2009 ndo kuvhanganya vhanwe vha vhaswa vha bvaho kha kusi kwa hune nda dzula hone na zwisi zwa tsini hashu, nda wana na zwilidzo na mugudisi wa u lidza burasi. Nga nwaha wa 2010, rovha ro no kona u kuvhangana miraḓo ya bennde nau thoma u lidzela vhathu kha vhuṱambo havho," vha ralo.
Vho-Ramahuma vho no gudisa vhaswa vhau swika 30 kha minwaha yo fhiraho, vhane zwa zwino vho novha na vhukoni hau lidza burasi. "Nga nnḓa hau vha gudisa sa vho ramuzika, bennde iyi yo novha tshiimiswa tshine vhaswa vha ḓa u wana ngeletshedzo dza vhutshilo. Ri vha eletshedza u aluwa kha uvha vhanna vhane vha ṱhogomela miṱa yavho, ri khou kona uvha fhaṱa hone ro ḓi imisela u thusa vhaswa vhanzhi," vha ralo Vho-Ramahuma.
Moloko Masepa, ane avha mulidzi kha bennde iyi, hone o thoma na bennde iyi ubva fhasi, uri ndi bennde iyi yo mu fhaṱaho uri avhe munna ane avha ene namusi . "Hoyu ndi muṱa une ra gudisana na zwa vhutshilo hone ndi koloda Vho-Ramahuma zwinzhi kha zwe vha nngitela," vha amba.
Vhaswa vhane vha takalela u guda u lidza zwilidzo vhanga kwama Vho-Ramahuma kha 064 950 9210.