Tshiṱori nga: Kaizer Nengovhela. Ṱhalutshezo nga: Khathutshelo Raliphaswa.
Vhafuni na vhatevheli vha muzika vha khou hwelelwa uri vha renge dzi thikhithi dza bepha ḽa Phalaphala FM Royal Heritage nga vhunzhi nga ḽidzhakanḓila kha muzika wa rege Vho Colbert Mukwevho. Vha khou vha fulufhedzisa uri vha do mvumvusea lwa maṱhakheni nga Mugivhela wa ḽa fumi-na-rathi Khubvumedzi, une ho tou sala maḓuvha maṱuku uri ḽi takutshedze.
Vho Mukwevho vhari vha khou ḓi lugisela u mvumvusa vhathu kha bepha iḽi. "Zwine nda nga amba ndi uri misi yoṱhe ndi dzulela u nea vhatevheli vhanga zwine vha ṱoḓa na u vha fusha," vha amba. Ṅwaha-uno Vho Mukwevho vha ḓovha vha khou mvumvusa vhathu lwa vhuṱahe kha bepha iḽi.
Uya nga ha Vho Mukwevho, vhari bepha iḽi ḽi khou aluwa minwaha i tshi anda, hone ḽi dovha hafhu ḽavha ḽi khou takula vunḓu ḽa Limpopo kha mapa wa vhumvumvusi. U funwa ha muzika wavho nga lushaka zwi touvha mashudu mavhuya khavho, zwihulu vha tshi vhona uri na vhanwe u mona na shango vha takalela muzika wavho. "Naho vhanwe vhathu vha sa pfesesi luambo lune nda lu shumisa kha muzika wanga, Tshivenda, ndi takalela uri vhaa tevhela muzika wanga." vha engedza.
Munwe ramuzika ane a ḓo mvumvusa vhathu kha bepha iḽi, ndi ramuzika wa tshingondo Zozo, uri muzika une a mvumvusa vhathu ngawo ndi une wa ṱuṱuwedza, u pfesesa, na u alusa u ṱhonifhana vhukati ha dzi tshaka. "Ndo takala vhukuma uri na nṋe ndi ḓo mvumvusa vhathu kha bepha iḽi. Vhatevheli vhanga vha ḓo fushea nga nḓila ine nda ḓovha ndi khou vha mvumvusa ngayo," a amba.
Vho Divhambele Mbalavhali, muambeli wa bepha ili la Royal Heritage Festival, vhari vhathu vhane vha ḓo dzhenelela bepha iḽi vha fanela u lavhelela u ḓi phina nga nḓila yo fhambanaho na nga minwe minwaha u bva kha vhoramuzika vhoṱhe vhane vha ḓovha vha hone. Vhanwe vhoramuzika vhane vhathu vha ngavha lavhelela ndi Makhadzi, Leonard Zhakata, Benny Mayengani, DJ Jone, Sengere, Vhuyie the DJ, Rofhiwa Nethwadzi, na vhanwe vhanzhi.
Vho Mbalavhali vhari vhathu vha ṱutshele kule na u renga dzi thikhitha nga nḓila dzi songo fanelaho ngauri a vha nga ḓo tendelwa u dzhena. Thikhithi dzoṱhe dzi khou rengiswa nga R230 muthu muthihi.