Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Vha tshiimiswa tsha Rofhiwa Manwadu na vha khoro yavho Gole Mphaphuli ya sialala vha ḓo fara bepha ḽa sialala na mvelele ngei luvhanḓeni lwa Makwarela ṅwedzi u ḓaho nga ḽa sumbe Tshimedzi.
"Ri fulufhela uri zwikolo zwoṱhe zwo khetheaho u mona na tshiṱiriki tsha Vhembe, na zwikolo zwa vhana vha vhaholefhali kha tshiṱiriki vha ḓo dzhenelela bepha iḽi ḽa zwa mvelele. Vhagudiswa vha ḓo dzhenelela kha mitambo ya sialala yau fhambana u fana na muravharavha, khadi, na miṅwe mitshino ya sialala u fana na malende na tshigombela," hu amba Vho Tebogo Raliphada, vhane vhavha muraḓo wa bodo ya dzangano ḽa Rofhiwa Manwadu. Vho amba izwi nga tshifhinga tsha muṱangano wa u dzudzanya, we wa dzhenelelwa nga zwikolo zwo khetheaho kha vunḓu na tshiṱirikini tsha Vhembe ngei Ṱhohoyanḓou Indoor Centre nga Lavhuṱanu ḽa 12 Fulwana.
Mudzulatshidulo wa foramu ya vhaholefhali kha tshiṱiriki tsha Vhembe, Vho Thomas "White Man" Makhanthisa, vho thoma tshipitshi tshavha ngau amba zwauri "vhaholefhali vha na ḽiambiwa ḽauri 'Ahuna zwithu nga rine husina rine'. Zworalo, ri fanela u ḓivhadzwa nga a zwoṱhe zwine zwa itiwa zwine zwa kwama vhathu vha vhaholefhali. "
Vho amba zwauri vho fanela u ḓivhadza zwikolo zwoṱhe zwo khetheaho u mona na tshiṱiriki tsha Vhembe uri vha dzheniswe khau dzudzanya bepha iḽo. Mimasipala yau fhambana vho fulufhedzisa zwauri vha ḓo netshedza thikhedzo dzavho kha bepha iḽi. Vhahulisei vho khwaṱhisedzwa zwauri vhuendi vhu ḓovha hone hau vha isa bephani vha dovha hafhu vha vhuiswa.
Vhadzudzanyi vha khou humbela uri huvhe na u shumisana nauri vhathu vha thuse nga u netshedza zwine vha nga kona u fana na u swielela vhaholefhali vha bvaho ka mimasiapala yau fhambana ya kule hone vhuṅwe vhupo ha ngei Musina hu a ḓura. Vhane vhavha na dzangalelo ḽau dzhenelela bepha iḽi vha nga kwama mudzulatshidulo vha foramu ya vhaholefhali ya tshiṱiriki tsha Vhembe Vho Thomas Makhanthisa, kha nomboro dza 071 527 7867.