Tshiṱori nga Kaizer Nengovhela. Ṱhalutshedzo nga Khathutshelo Raliphaswa.
Vhanameli vha bisi vho humbelwa uri vha vhige milandu ya u reila ngau salonda kha khamphani dza bisi kana komiti dza vhalanguli vhamabisi. Hezwi zwi tevhela khombo yobvelelaho nga Ḽavhuṋa ḽa 2 Phando 2025, musi bisi i tshi timba, to ya huvhadza vhanameli vha swikaho vha fumi-ṱhanu.
Tshiwo itshi tsho itea kha bada ya N1, khilomithara dzi si gathi tshipembe ha nḓila ya u bva Waterpoort. Bisi yo vha i tshi khou endedza vhanameli vha tshi khou bva ḓoroboni ya Louis Trichardt vha tshi khou ya fhethu hu no nga Hamudimeli.
Vhanameli vho huvhalaho vho gidimiselwa vhuongeloni ha Louis Trichardt Memorial na Siloam. Vhunzhi havho vho bviswa nga murahu ha musi vho no wana dzilafho ḽa u ṱhavhiwa na mishonga. Vhaṅwe vho bviswa nga ḽeneḽo ḓuvha, ngeno vhaṅwe vho dzula vhusiku honoho vhuongeloni he vhavha vho gidimiselwa khaho.
Uya nga ha munwe wa vhanameli Vho Mavis Mulaudzi vha bvaho Hamudimeli, vhanameli vho vha vho gungula kha mureili nga ha u reila nga luvhilo luhulu. Fhedzi vhari mureili o vha a songo dzhiela nṱha mbilaelo dzavho nahone a bvela phanḓa na u reila. Vho Mulaudzi vhari ho vha na khakhathi musi bisi i tshi rembuluwa, ya posa vhanameli nnḓa.
Vho Mulaudzi vho engedza nga uri vhanameli vha anzela u ṱangana na u dzi khaedu musi vha tshi gungula nga ha bisi dzi sa shumiho badani kana dzo hwalaho zwithu zwinzhi. Vhari vhareili vha bisi vha vha vhudza uri vha songo shumisa "zwiendedzi zwavho fhedzi" arali vha songo takala. Vho dovha hafhu vha amba uri u vhiga zwiwo kha vhalanguli a zwi anzeli u bveledza vhukando.
Muambeli wa khamphani ya bisi dza Mabirimisa, Vho Thilivhali Mabirimisa, vhari khamphani i fara miṱangano ṅwedzi muṅwe na muṅwe na vhaofisiri vha bada na vhuendi nahone ndi khombekhombe u vhona uri bisi dzoṱhe dzi a kona u tshimbila badani. Vho ombedzela uri tsireledzo ya vhanameli ndi ya ndeme. "Vhareili vhashu vha nga muṱa kha riṋe. Ri hwala avha vhanameli ḓuvha ḽiṅwe na ḽiṅwe u bva mahayani avho u ya tshikoloni na mushumoni," vha amba.
Vho Mabirimisa vho ramba vhanameli uri vha vhige u reila nga usalonda nga u shumisa nomboro dza vhukwamani dzo sumbedzwaho kha bisi kana nga u ḓivhadza komiti dza vhaimeleli vhavhanameli, dzine dza ḓo isa mafhungo kha vhalanguli. Vho engedza nga uri ho dzhiiwa maga a u kaidza vhareili vhane vha khou pomokwa u sa londa, hu tshi katelwa na u imiswa mushumoni, arali vha wanala vhe na mulandu.
Muṅwaleli wa Dzangano ḽa Bisi ḽa Vhembe, Vho Patrick Mapengo, vho amba uri vhanameli vha nga dovha vha vhiga zwiwo zwa u reila nga vhutsilu kana bisi dzi songo teaho badani thwii kha Muhasho wa Vhuendi.
Muambeli wa mapholisa Vhembe, W/O Vho Vuledzani Dathi, vhari mapholisa vha kha ḓi sedzulusa tshivhangi tsha khombo iyi. Ho ṅwaliswa mulandu wa u reila nga vhutsilu.