Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Phathutshedzo Netshivhulana wa minwaha ya fumbili-ṱhanu u bva kusini kwa Tshaulu o anḓadza bugu yawe ya u thoma nga ṅwaha wa 2021 ine ya pfi Pfuramathupho, ine oi ṅwala a tshi tou i livhana thwii na lushaka lwa Vhavenḓa. Tshifhinga tshi tshi enda o ḓou thoma u wana vhathu vha tshaka dzo fhambana vha tshi takalela u vhala bugu yawe ndi afho atshi kombetshedzea u ṅwala iyo bugu nga Luisimane. Iyo yo ṅwalwaho nga Luisimane i vhidzwa At the Heart of Sorrow yo anḓadzwa mafheloni a ṅwaha wa 2022, ye ya kunga maṱo a vhanzhi vha mashango a Africa na vha kule u swika na Russia.
Bugu iyi i amba nga vhutshilo ha matshudeni na dzi khombo dzine vhaswa vha ṱangana nadzo. A tshi vhudziswa uri ndi ngani oi ṅwala na nga Luisimane uri ndi ngauri matshudeni manzhi a vha pfesesi Tshivenda fhedzi ndi bugu ine i nga vha thusa, ndi he a vhona uri ndi khwine a tshi i ṅwala hafhu na nga Luisimane. "Ro i ṅwala nga iṅwe nyambo uri ri swikelele vhavhali vhanzhi," u amba ngauralo.
Phathutshedzo uri lwendo lwawe lwau ṱhaphudza pfunzo dzawe dza digirii ya nzudzanyo dza vhupo lwovha lu songo leluwaho. "Ndo ṱangana na dzi khaedu nnzhi sa mutshudeni dze ndavha ndi songo lavhelela, ndi ṅwala nga hadzo na nḓila dze nda kunda khaedu idzi. Na vhabebei vha ḓo kona u ḓivha dzi khaedu dzine vhana vhavho vha ṱangana nadzo sa matshudeni u fana na u tambudzwa ha mbeu magudedzini. I ṱalusa tshaka dza u tambudzwa, zwi vhangi na nḓila dza u zwi thivhela. Muloro wanga ndi u wana bugu yanga yo themendelwa nga vha muhasho wa pfunzo kha vhagudiswa vha murole wa fumimbili, i ḓo vha thusa vha tshi ḓi lugisela uya magudedzini na kha matshilo avho musi vhe magudedzini," a amba.
"Heyi ya Luisimane i khou ita bvumo u mona na ḽifhasi, thengo yayo yo gonya vhukuma u bva tshe ya anḓadzwa. zwothe hezwi ndi vhona hu u kana mitshelo ya mushumo wanga. Ndi na vhavhali vha bvaho Zimbabwe, Botswana na Russia vhane vha takalela bugu yanga, zwine sa ṅwana wa hayani ndovha ndi songo zwi lavhelela," a vhina ngaurali.
Vha tshi ṱoḓa bugu na zwidodombedzwa vha kwama Phathutshedzo kha 072 493 9114 kana vha mu tevhela kha siaṱari ḽawe kha Facebook Phathutshedzo Netshivhulana.