Tshiṱori nga Elmon Tshikhudo. Ṱhalutshedzo nga: Khathutshelo Raliphaswa.
Uvha kha khasho asi mushumo fhedzi kha muhashi wa Univen FM, Mutshidzi "Chizinator" Rambau. Kha Mutshidzi ndi mbidzo ine ai funa na ui takalela. Mutshidzi u ḓivhiwa nga ḽa Chizinator kana Deep Voice kha vhatevheli vhafuni vhawe vha Univen FM, iḽi ndi dzina ḽe a ḽi wana sa muhashi wa Univen Radio hune a hasha mbekanyamushumo ya Community Drive.
Mutshidzi o bebwa a aluwa Madombidzha, kha tshiṱiriki tsha Sinthumule, he radio yovha i tshipiḓa tshawe tsha ḓuvha ḽiṅwe na ḽiṅwe sa izwi yovha i tshi dzulelwa u lidzwa hayani. "Ndovha na dzangalelo kha zwa radio ndi tshe muṱuku. Zwovha zwi tshi touvha zwiḽiwa zwa ḓuvha ḽiṅwe na ḽiṅwe, lune zwovha zwi songo leluwa u zwi thudzela kule. Ndo ḓou ḓelwa nga ndoro yau vhala mafhungo ndi murahu ha khudzaipfhi," a amba.
O ḓou thoma uvha tshipiḓa tsha Univen nga ṅwaha wa 2022."Ubva tshetsho, athi athu u humela murahu, hone ndi dzulela u aluwa," a amba. Ṅwaha wofaho, ovha muṅwe wa vhe vha dzhenelela muṱaṱisano wa Phalaphala FM Ṱhodela Vhukoni he a guma kha vha malo vha khwine. "Naho ndi songo kunda hone ndo bva hutshe mathomoni a muṱaṱisano, zwo nṱuṱuwedza uri ndi bvele phanḓa na mushumo wanga. Zwo ita uri ndi zwi vhone uri ndo khethea hone ndi na vhukoni sa muhashi," a amba.
Chidzinator u tenda kha u dzhia u sasaladzwa nau khoḓiwa sa izwi zwi tshi fhaṱa nyaluwo na usa nyama. Ndi mushumi wa biko ane a ṱuṱuwedza vhaṅwe vhafumakadzi, ane a lwela u wedza ndoro dzanga," a amba.
Nga nnḓa ha uvha muvhali wa mafhungo na muhashi, Chidzinator u dovha hafhu avha mubveledzi tshiṱitshini. Nga nnḓa ha radio, u khou gudela masiṱasi yawe kha zwa Environmental Sciences Yunivesithi ya Venda. U ḓivhelwa uvha na vhutsila hau fhambana, hune ono hasha mbekanyamushumo nnzhi na uvha mugudisi kana muthusa matshudeni.