Tshiṱori nga: Maanda Bele. Ṱhalutshedzo nga: Khathutshelo Raliphaswa.
Muraḓo wa dzangano ḽa SCOUTS ya Afrika Tshipembe, Collen Fhulufhelo Ramuthivheli, o vhuya hayani Ha-Maelula, Nzhelele u vula dzi gammba dza u gudisa vhaswa nga ha dzangano ḽa SCOUT.
Collen wa minwaha ya furaru-mbili o thoma zwa uvha ṱholi nga ṅwaha wa ḓaṱahe fuṱaheṱahe a Kagiso vhuponi ha Krugersdorp. Uri u kungea hawe kha zwa uvha ṱholi ndi ngauvha na dzangaleleo kha nzulele ya vhathu na vhupo.
"Kha lwendo lwanga ndi na vha dzangano ḽa Scout, ndo wana tshikhala tshau dzhenelela kha nyambedzano dza 21st World Scout Jamboree, ye ya farelwa United Kingdom nga ṅwaha wa gidimbili-sumbe. Nga ṅwaha wa gidimbili fumi, ndi na minwaha ya fumi ṱahe ndo nangwa uvha muimeleli wa SCOUTS ya Afrika Tshipembe kha guvhangano ḽa vhuṋa ḽa dzi ṱholi u mona na ḽifhasi ngei Sharjah, United Arab Emirates. Ngau imelela Afrika Tshipembe, ndi fulufhela uri ndo kona u ḓisa tshanduko kha nḓila ine vhathu vha humbula ngayo Dubai nga mbekanyamushumo ye nda bveledza nga ṱhoho ya 'nyambedzano ya vhaswa nga ha dwadze tshifu ḽa HIV/AIDS'. Ndovha ndo ḓalelwa nga dakalo ndi tshi ṋeiwa dzi pfufho sa izwi ndovha ndo fara vhuimo ha vhuṋa kha khethekanyo ya mishumo miṱuku, khayo hovha ho dzhenelela mashango a fusumbe malo, na vhathu vha ḓana fumbili-raru. Nga ṅwedzi wa Shundunthule ṅwaha wa gidimbili fumi, ndovha muraḓo wa mbekanyamushumo ya gammba u mona na ḽifhasi shangoni ḽa USA, he nda shuma sa muraḓo wa gammba ya Philmont lwa miṅwedzi miraru," a amba.
Collen o no thusa vhunzhi ha vhaswa u ḓi bveledzisa nau aluwa lune vha kona u ḓi sikela vhumatshelo havhuḓi, nauri vha kone u shumela mivhundu ine vha dzula khayo nga nḓila ine ya konwa nga dzi ṱholi fhedzi.
"Ndi takalela u thoma tshigwada tsha vhaswa vha minwaha ya futhihi u swika kha fumbili rathi vhane vha ḓovha kha mbekanyamushumo ine ya ḓo netshedzwa nga vha SCOUT ya Afrika Tshipembe, ndivho ya u thoma tshigwada itshi ndi u ṱoḓa u fhaṱa zwigwada zwinzhi zwa dzi ṱholi," a amba.
Collen u ramba vhabebi na vharangaphanḓa vha mivhundu ya Nzhelele uri vha thusane u fhaṱa tshigwada tsha dzi ṱholi hune vhana na vhaswa vha ḓo kona u ḓisa tshanduko kha matshilo avho na vhahulwane vha ḓo kona uvha na zwikili zwine vha ḓo zwi shumisa u bveledzisa vhupo na u fhaṱa vhushaka vhukati ha vhadzulapo.
Vha tshi ṱoḓa u wana zwinzhi nga vhuḓalo vha nga kwama Collen kha email yawe ya fhulu.collen@gmail.com.