Tshiṱori nga: Victor Mukwevho. Ṱhalutshedzo nga: Khathutshelo Raliphaswa.
Fhaḽa Tshilamba ho ṱoḓou ima tsere nga Mugivhela wa ḽa u thoma ḽa Lambamai, musi vhafunani vhavhili vhe vhavha vha tshi khou malana nga mutshato, vha tshi bvelela vho namela gariki ya donngi. Hovha na mihuvho mihulu kha vhadzulapo na vhafhiri vha gondo musi Awelani Nefale a bvaho Vondwe, na Livhuwani Madzonga a bvaho Tshandama, vha tshi bvelela.
Mufumakadzi we avha a tshi khou reia iyo gariki, we avha a tshi khou dzi luludzela lwa maṱhakheni, o takadza vhathu musi a tshi paka iyo gariki lwa vhugwena, u tou nga musi mureili wa ḽiṱiraka ḽihulu a tshi ḽi paka phanḓa ha mavhengele tserekani. Musi vha tshi swika afho mavhengele tserekani, avho vhavhili vho ḓo dzheniswa kha ḽigoloi ḽihulu ḽo magwaho fhaḽa Germany.
Musi ṱhalano na mabulayo mbinganoni zwi nṱha vhukuma kha ḽino shango, hu tshi katelwa na kha tshiriki tsha Vhembe, zwi a femulusa muya u vhona mutshato wa maimo a nṱha ngauralo. Awelani Nefale ori hetshi ndi tshone tshifhinga tshine havho vhane vha khou funana, vha tea u sumbedza ḽifhasi uri arali vha nga humbela Mudzimu uri a shudufhadze mbingano yavho, hu nga sivhe na tshino dina.
"Mbingano yo thonwa nga Mudzimu uri munna na mufumakadzi vha dzule vhoṱhe vho ḓi takalela. Vhunga rine ri tshi tshila na Mudzimu, lufuno lwashu lu do fhufhuma u swika nga hu sa fheli," Izwo zwo ambiwa nga Awelani.
Livhuwani Madzonga we avha o ḓala nga dakalo, a tshi khou setshelela, ori u livhuwa Mudzimu vhunga vho ita uri namusi avhe vho Mme Nefale.
"Ndo ḓala dakalo u kona u malwa nga munna o nakaho ngaurali nau ofha mudzimu. Mudzimu ndi dovha vha renda maḓuvha oṱhe a vhutshilo hanga," vha ralo Vho Mme Nefale.