Tshiṱori nga: Victor Mukwevho. Ṱhalutshedzo: Khathutshelo Raliphaswa.
Vhadzulapo vha kusi kwa Tshiseluselu na zwinwe zwisi nga tsini vha khou farana zwanḓa uri vha valise damu ḽa Damani ḽine ḽavha khombo kha vhadzulapo, afha ndi kha damu ḽe Vho-Phillip Neluvhola vha ṱangana na tshiwo tsha ngwena khulu vhukuma minwaha ya murahu.
Kha minwaha ya u fhira mahumi mavhili damu iḽi ḽo fhaṱwa, ngwena dza afho damuni dzo no fhirisa shangoni vhathu vha swikaho vha sumbe, hu tshi katelwa vhadzulapo vha ḽa Zimbabwe. Nga ṅwaha wa giimbili fumi malo, ngwena yo ṱhasela ṅwana wa mutakana wa minwaha ya fumithihi wa u bva kusini kwa Tshiseluselu e damuni iḽi a khou kuvha na ṱhama dzawe. Ngwena iyo yori umu ṱhasela ya mu panga madini, hango tsha dovha a wanala.
Vho-Neluvhola vhari vhovha vha khou ṱamba ngomu damuni nga ḓuvha ḽe vha ṱoḓa u ṱhaselwa nga ngwena damuni iḽi, "Ndo pfa vhalisa vha dzi kholomo vha tshi huwelela uri huna ngwena, fhedzi ndori ndi tshi tou mona, ngwena ya nthwa nga murahu ya fhufha nṱha ha ṱhoho yanga ya dzhena damuni. Hu saathu u fhela na tshifhinga tshingafhani, ya mona ya ntsedza, ndi he nda fhufha nda gidima nga luvhilo ndi tshi gidimela he vhalisa vha vha vho ima hone, zwoṱhe zwa sia nne na vhalisa ro mangala nga ha zwine zwa khou itea," vha amba.
Vho-Neluvhola vhari naho zwo vha konḓela, vho ṱanganedza uri na ngoho ahuna zwine muvhuso wa ḓo ita u tsireledza vhadzulapo, naho vha na vhuṱanzi ha uri damu iḽi ḽi khombo kha vhadzulapo. Vho-Neluvhola vho sumbedza u vhilaela nau kwashekana kha ipfi lavho, "Naa hu fanela u lovha vhathu vhangana uri vha kone u vala damu iḽi?" vha vhudzisa nga mbilu vhuṱungu.
Vha nyanḓadza mafhungo vho kundelwa u wana phindulo kha vha muhasho wa vhupo na vhuendi vha saathu u anḓadza mafhungo aya.