Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Thahelelo ya maḓi ndi khaedu kha vhunzhi ha vhupo ha Vhembe. Lwa minwaha minzhi vhathu vha tshila vha sina maḓi o kunaho. Vhadzulapo vha kombetshedzea u shumisa maḓi ane hango lugela u ṅwiwa nga vhathu vhuponi vhunzhi.
Nga ṅwaha wa gidimbili fumirathi, mudzulapo wa kusi kwa Ha-Mammburu, Vho-Phineas Madaela vha minwaha ya furathi-thihi, vho dzhia tsheo ya u tandulula khaedu ya maḓi ine vhadzulapo vha ṱangana nayo. Vho-Madaela vho vha vha na fulufhelo ḽa uri vha ḓo kona u swika hure na maḓi fhasi ha mavu vha thoma u gwa muḓini wavho. Nga murahu ha maḓuvha a fumi ṱhanu a u gwa nga u shumisa piki na fosholo, vho wana maḓi kha mithara dza sumbe u tsa fhasi. Izwo zwo ḓisa dakalo na u ṱhaḓulea kha vhadzulapo.
Vhadzulapo vho ṱoḓa thuso ya dzi phaiphi u bva muḓini wa Vho-Madaela uya kha vhadzulapo nnḓa hune ha ḓo vheiwa na mathannga, vha dzangano ḽa Economic Freedom Fighter (EFF) vho fulufhedzisa thikhedzo yavho nau thusa nga u engedza u vhora maḓi kusini uku, fhedzi ahuna thuse ye vha isa tshitshavhani. U swika zwino afho he Vho-Madaela vha gwa ahuathu u shumiswa.
Kha kusi kwa Ha-Lambani nnḓa ha Ṱhohoyandou, David Trynos Hungwe, nae o dzhia tsheo yau ṱoḓa u tandulula khaedu ya maḓi kusini kwa hawe nga u shumisa piki, zwipeidi, tshiṱepisi na zwinwe zwishumiswa u gwa maḓi. Kha Hungwe zwo tou dzhia maḓuvha mararu u swika hure na maḓi, mithara ya fumimbili u tsa fhasi. Mushumo uyu wavhuḓi wa Hungwe wo ita ṱhoho dza mafhungo kusini uko, zwa kunga vhunzhi ha vhathu vha tshi ṱoḓa u vhona mushumo uyu wavhuḓi.
Hungwe, ane zwa zwino ha shumi, uri o pfa zwo fanela uri a lingedze u tandulula khaedu iyi sa izwi muvhuso u sa khou ḓisa tshumelo yo teaho kana uvha tandulelo thaidzo ya maḓi. Lwa minwaha, vhadzulapo vhovha vha sina tshumelo ya maḓi o kunaho, vha tshinwa maḓi a milamboni vha tshikovhekana nazwifuwo u ṅwa, u ṱamba na u kuvha. Naho muvhuso u tshi fulufhedzisa tshumelo ya maḓi, ahuna tshumelo ine ya ya tshitshavhani.
Nga ṱhuṱhuwedzo yawe ya u swikelela maḓi, Hungwe o vhona izwi hu tshikhala tshine tsha ḓo vhuyedza muvhundu wavho. Maḓi ayo o swikelelwaho nga Hungwe, o ṱoliwa hone o khwaṱhisedzwa uri ana mutakalo, zwe zwa ḓisa dakalo na fulufhelo kha vhadzulapo.
Uri vhadzulapo vha shumise maḓi aya zwavhuḓi, vha fanela u wana dzi phaiphi, na dzi bommbo uri maḓi a swikeleliwe nga vhadzulapo zwavhuḓi. Sa izwi Hungwe asa shumi, mushumo na zwishumiswa izwo zwi ḓo konḓa. Vha kusi uku vha khou humbela muvhuso kana muthu wa mbilu ya musamaria ane anga kona u thusa u fhedzisa mushumo uyu ngau nea zwishumiswa zwo teaho.
Mukoma wa kusi uko, Vho-Samson Muvhango, vha fhululedza Hungwe kha mushumo wavhuḓi wau swikelela maḓi na uḓi imisela hawe kha mushumo uyu. Vha tenda uri maḓi aya aḓo thusa kha khaedu ya maḓi ine vhadzulapo vha ṱangana nayo ḓuvha linwe na linwe, zwa dovha hafhu zwa sumbedza uri sa vhadzulapo avha faneli u ḓi tika nga muvhuso fhedzi uri vha wane dzi thandululo kha khaedu dzine vha ṱangana nadzo.
Ane a takalela u thusa David Trynos Hungwe na vhadzulapo a nga kwama Hungwe kha 071 406 3684.