Tshiṱori nga: Vhoramabindu. Ṱhalutshedzo nga: Khathutshelo Raliphaswa.
Elelwani Rambuda u touvha tsumbo ya uri maḓuvha au nyadziwa ha maanḓa a vhafumakadzi o fhela. Elelwani a bvaho Tshimbupfe Mavhulani tsini na Vuwani, una ṱhanziela ya digirii u bva gudedzini ḽa Vhembe TVET College ya uvha makhanikhe. Zwa zwino u shuma u lugisa mitshini mihulwane i fanaho na dzi dzhenereitha, mitshini ya u gera mahatsi, bommbo ya maḓi na minwe minzhi.
Nga murahu ha u pfumbudzwa kholedzhini, o shuma asa lavheleli masheleni kha khamphani ya u lugisa zwishumiswa ngei Ṱhohoyanḓou, he vha fhedza nga u mu thola sa mushumi wa bindu lavho. Nga uvha na muḽoro wa uvha na bindu lawe, o ḓou ṅwalisa bindu ḽawe a tshe mushumi kha khamphani iyo ya Ṱhohoyanḓou. U ṅwalisa bindu ḽawe zwo rwelwatari nga nwaha wa gidimbili fumbili. Nga ṅwaha wa gidimbili fumbili-thihi o ḓou ṱutshela mushumo wawe a sedzana na bindu ḽawe fhedzi. Ovha a tshi shuma ngau tou tevhela vhathu hune zwishumiswa zwine a khou fanela u zwi lugisa zwa vha hone, o touvha mashudu mavhuya musi ramabindu vha vhupo hawe, Vho-Langanani Ravele vha tshi mu ṋea tshifaṱo tsha u shumela hone nga mahala, hu u livhuwa na u fhululedza mishumo yawe yavhudi.
Uvha na fhethu hawe hau shumela zwo leludza nḓila yawe yau shuma sa izwi a tshi shumela fhethu huthihi u fhira u shumisa zwiendedzi a tshiya u vha lugisela. O sumbedza u livhuwa Vho-Ravele kha thikhedzo yavho, ye ya mu thusa kha u alusa bindu lawe.
Elelwani u ṱuṱuwedza vhanwe vhaswa vha vhafumakadzi uri vha shumise zwine vhavha nazwo u ḓi sikela mishumo. Elelwani uri: "A thi tendelani na vhathu vhane vha vha na kuhumbulele kwa uri vhafumakadzi a vhango fanela u shuma mishumo yo raliho. Arali muthu a tshi ḓi fulufhela na u shuma o ḓi nekedzela, ua kona u bveledza miloro yawe. Ndi takalela uri na vhanwe vhathu vha ḓi vhetshele ndivho dzine dza swikelelea na u shuma vho ḓi funga uri vha kone u bvelela zwavhuḓi."