Ṱhalutshedzo nga Khathutshelo Raliphaswa.
Mutsila Fanelo Shibambu a bvaho kha muvhundu wa Gumbani Hamalamulele, u khou ḓi sikela dzina kha nḓowetshumo ya zwa vhutsila e na minwaha ya fumbili-ina fhedzi. Naho a tshi tshila e na thaidzo ya usa pfa zwavhuḓi, Fanelo o no tswa mbilu na maṱo a vhanzhi nga vhutsila hawe.
Lwendo lwawe kha zwa vhutsila ho thoma musi atshe kha pfunzo dzawe dza fhasi musi a tshi shumisa dzi penisela na khirayonin u ola. Atshe muṱuku, Fanelo o ḓou kumedzela vhunzhi ha tshifhinga tshawe a tshi bva tshikoloni khau ṱuṱula vhutsila hawe, a tshi ola zwithu zwau fhambana hone nga nḓila dzau fhambana.
"Ndovha ndi tshi dzulela u ola tshiṅwe na tshiṅwe tshine nda vhona nga maṱo anga, ndi sa ḓivhi uri zwi ḓo kunga maṱo a vhathu zwa tswa mbilu dza vhathu. Ndi tenda khauri ndo bebelwa uvha mutsila, hone ndi zwi takalela u fhira zwithu zwoṱhe vhutshiloni. Kha nṋe, vhutsila ndi vhutshilo, hone u bveledza hanga ndi nḓila yau ṱuṱuala vhutsila hanga. Kha zwine nda bveledzela vhathu, ndi ita ndo ḓi funga sa izwi ndi tshi funa vharengi vhanga vhunga ndi tshi funa mushumo wanga," a amba.
Uḓi imisela ha Fanelo kha zwa vhutsila zwi mu thusa u kunda khaedu dze avha a tshi ṱangana nadzo dze dza ḓa na uvha na thaidzo ya u sapfa zwavhuḓi. Lufuno lwawe kha zwa vhutsila, lwe lwa ṱuṱulea zwezwi minwaha i tshi tandululana, zwo no anwa mitshelo sa izwi a tshi kona u ḓi unḓa nga hone vhutsila hawe.
"Nga yone ṱhahelelo ya mishumo, zwihulu kha vhaswa, ndi ḓi unḓa nga kha zwa vhutsila hanga. Ndi tshi thoma zwovha zwi songoo leluwa, nga yone khaedu ya u sapfa zwavhuḓi, fhedzi nda wana nḓila dza u phuletshedza ngau humbela zwinepe ubva kha vharengi, uri ndi kone u vha bveledzela zwine vha khou takalela," a amba.
"Ndi shumisa zwe nda guda ubva kha YouTube, zwine zwa nthusa uri ndi khwinifhadza fhaḽa na fhaḽa kha vhutsila hanga. Vhunzhi ha vharengi vhanga vha khoḓa mishumo yanga hone vha a vhudza vhaṅwe nga ha mishumo yanga, zwine zwa nṱuṱuwedza uri ndi shume nga maanḓa. Hone ndo ḓi imisela u gudisa na vhaṅwe vhaswa vhane vha na dzangalelo kha zwa vhutsila," a engedza.