Tshiṱori nga Victor Mukwevho. Ṱhalutshedzo nga Khathutshelo Raliphaswa.
Mugidimi wa mbammbe ya Comrades Marathon a ḓivheaho sa Fhatuwani Mudau u bva kusini kwa Khubvi u tenda uri o ḓiimisela u ṱaṱisana kha mbambe iyi ya ṅwaha uno.
Vhagidimi vha bvaho shangoni ḽoṱhe vha ḓo vha vha tshi khou ya kha vunḓu ḽa KwaZulu-Natal u itela u shela mulenzhe kha ultra-marathon i ḓivheaho vhukuma ya ḽifhasi, ine ya ḓo vha hone nga Swondaha, ḽa 8 Fulwi.
Mudau o vhonala a tshi khou awela fhethu hawe ha zwa mabindu nga murahu ha u gidima hawe ha ḓuvha na ḓuvha u bva Khubvi u swika Thohoyandou nga Sondaha nga matsheloni. Musi a tshi vhudziswa arali a tshi khou gudisa lushaka lwa henefho, o amba uri ovha a tshi khou livhisa vhuḓidini havho hoṱhe ha u lugisela mbambe ya nwaha uno. "Ndo thoma udi lugisela mbambe nga ṅwedzi wa Ḽara ṅwaha wo fhiraho. Ndo no ḓi ṱanganya khilomithara dzi fhiraho 1 012 u bva tshe nda thoma u ḓi lugiselela, nahone ndi pfa uri zwino ndo no ḓilugisela," a amba.
Mudau o bebiwa Soshanguve, Pretoria, fhedzi a pfulutshela muvhunduni wa Khubvi musi e na miṅwaha ya 16. Nga maḓuvha awe a tshikolo tsha nṱha tsha Silemale, o shela mulenzhe kha mbambe dza 100m na 200m. O vha a tshi vhidzwa nga dzina ḽa u ḓihudza ḽa "Carl Lewis" musi vhathu vha tshi mu vhambedza na mugidimi wa ḓivhazwakale wa Amerika.
Nga murahu, o mbo ḓi livhisa ṱhogomelo yawe kha zwa mbambe nahone a fhedza o tholiwa nga vha Maize Meal Phosphate Club, ine ya vha Phalaborwa, he a vha a tshi dzula hone lwa miṅwaha miṱanu. "Vho ri ṋea zwiḽiwa ṅwedzi muṅwe na muṅwe. Kha miṅwaha miṱanu ye nda vha ndi na tshigwada, a tho ngo vhuya nda tea u renga zwiḽiwa zwanga zwa zwiḽiwa," a amba.
Mudau u gudisa vhaswa vhanzhi ngei Khubvi na mivhunduni yanga tsini kha u gidima badani, fhedzi o khetha vhatambi vhavhili vha fulufhedzisaho, a tshi ri vha ḓo ita mvelelo khulwane kha mutambo tshifhingani tshi ḓaho.
"Ndumulelo Marubini na Rolivhuwa Ndou vho ntakadza u bva tshe nda thoma u shuma navho, nahone vho no kunda kha mbambe dza tshikhala tshipfufhi. Vha khou ya u imela shango ḽashu kha mbambe dza dzitshaka ḽiṅwe ḓuvha," a engedza nga u ralo.