Tshiṱori nga: Andries van Zyl. Ṱhalutshedzo nga: Khathutshelo Raliphaswa.
Vhafunzi Vho Charles Mudau na mirado ya kereke yavho vha khou hwesiwa mulandu nga vha sosaithi ya Prevention of Cruelty to Animals (SPCA) ya Tshitandani, zwi tshi tevhela u vhulaha tshinona tshidivhea sa gwitha vha anḓadza kha zwileludzi zwa vhudavhidzani ha Facebook. Nyandadzo iyo yo dzhiiwa kerekeni ya vhafunzi Vho Mudau ngei Potter's House Word ire vhuponi ha Kutama kusini kwa Muduluni, nga Sondaha ya ḽa fumi rathi Fulwana, ṅwaha uno.
Vho Mudau na mirado vha tshivhidzo tshavho vho fara gwitha iḽo ḽi nnda ha tshifhaṱo tsha kereke yavho vha thoma u ḽi tambudza vha tshiri vha khou "thatha mimuya mivhi". Gwitha ḽo farwa ḽa dzheniswa ngomu ha kereke, he miraḓo miraru na vhafunzi avho vha tambudza gwitha iḽo, vho thoma nga u ḽi rwa nga thanda vha konou ḽi shela mapfura a nḓodzo na muno wa maḓembe kha ṱhoho na maṱo. Naho vho fhedza vho ḽi lungulula gwitha iḽi, ḽovha ḽo huvhala lwe ḽa balelwa na u fhufha zwavhuḓi u bva kha vhapondi avho vha kereke.
Vha SPCA yapo vho ḓivhadzwa nga ha nyanḓadza ya vidio iyo kha siaṱari ḽa kereke ḽa Facebook, ye ya anḓadzwa fhasi ha ṱhoho yauri "Another victory in the name of Jesus. An Evil owl was caught during live service @Potter's House Word Church Muduluni Village Hakutama Limpopo Province".
Nyanḓadzo yo sia vhathu vha tshi khou ita tsimbetsimbe kha zwileludzi zwa vhudavhidzani, zwihulu kha vhakriste vhe vha vha vha khou ḓi sendedza kule na zwiito zwau tambudza zwifuwo vha tsi shumisa dzina ḽa Murena. "Ndi ngani???... Vhafunzi vha khou ṱoḓa vhatevheli nga nḓila dzisi dzavhuḓi... vha ngavha vho tou luka maano uri vha fhure vhathu," uvho ndi vhupfiwa he ha ṅwalwa nga Phumudzo Percy Maphaha kha nyanḓadzo ya Facebook. "Izwi ndi zwone zwivhangi zwine zwa ita uri vhathu vhasi dzhiele vhukhriste nṱha kana zwithu zwa ndeme," uvhu ndi vhupfiwa ha Funi Malise. Kha vhanwe, nyanḓadzo iyi yo sia vhanwe vha tshi i vhona sa miḓai, hone vhanwe vha tshi khou ima na zwiito zwa vhafunzi Vho Mudau. "Zwi ṱoḓa muthu are na maṱo a zwa muya na nzumbululo uri a kone u vhona arali gwitha iḽo ḽi ḽa muya muvhi kana ḽi gwitha fhedzi. Vhaloi vha shumisa tshithu tshinwe na tshinwe, fhedzi kha zwoṱhe ri themba mudzimu. Zwine vhathu avha pfesesi ndi khwine vha tou fhumula husi u sasaladza zwivhumbiwa zwa mudzimu," ho ṅwala Rofhiwa Tshivhase Raphalalani kha Facebook.
Nga murahu ha u ḓivhadzwa nga ha tshiwo itsho na vidio kha Facebook, ṱholi ya SPCA yapo Vho Lawrence Khodobo vho mbo ya Muduluni nga ḽa fumbili Fulwana kha Vho Mudau. Vhori u swika vha ḓi ḓivhadza, Vho Mudau vha mbo vha vhudza uri vho vha vha khou vha lavhelela sa izwi hovha na vhupfiwa vhusi havhuḓi kha Facebook. Uya nga ha Vho Khodobo, Vho Mudau vhari gwitha iḽo ḽovha ḽi na mimuya mivhi nga u vhona uri ḽi khou fhufha nga masiari zwine a zwingo ḓowelea. "Ndovha ndi songo ḓi imisela u vhulayo gwitha iḽo sa izwi na nne ndovha ndi khou ofhela vhutshilo halo," vha amba.
U bvela phanḓa na tsedzuluso dzavho, Vho Khodobo vho humela kerekeni nga ḓuvha ḽi tevhelaho. Vho ḓou ḓivhadzwa uri gwitha ḽo vhoniwa ḽi mithara ya fumi kule na kereke. Lori u fhufhela nṱha ha ṱhanga ya kereke hune havha mithara dza malo uya nṱha. Ndi afho miraḓo ya kereke vha tshi dzhia tshiṱepisi vha fara gwitha ilo, vha konou ḽi tambudza zwi tshi kandiswa.
Vho Khodobo vho ḓou vulelwa mulandu na vhanwe vhararu vhane vhavha miraḓo ya kereke yavho vhane vha vha Messrs, Mugada na Makushu vhe vha vhonwa kha vidio iyo. Vho ḓi vhonadza khothe ya Magisiṱiraṱa wa Tshilwavhusiku nga ḽa fumi-thihi ḽa Ṱhangule. Vha khou livhana na u iswa khothoni lwa minwedzi ya fumi-na-mbili kana vha badela masheleni a swikaho zwigidi zwa fuiiṋa.
Tsengo iyo yo fhiriselwa phanḓa uya kha ḽa furaru-thihi Tshimedzi ṅwaha-uno sa izwi mapholisa vha kha ḓi bvela phanḓa na tsedzuluso dzavho.