Ṱhalutshedzo nga Khathutshelo Raliphaswa.
Muofisiri wa pholisa u bvaho muvhunduni wa Khubvi u kona hani u linganisa mishumo yawe sa munna wa muṱa, mufunzi, mutsila wa u tamba, mutambi wa zwilidzo zwa muzika, muinzhiniyara wa mubvumo, muṅwali wa muzika na mubveledzi nga nḓila i bvelelaho? Heyi ndi mbudziso ye vhathu vhanzhi vha i vhudzisa vhege yo fhelaho musi Hanie Mutele, ane a divhea vhukuma sa Tshigayo kha zwa u dimvumvusa, a tshi khou vhuya kha nḓowetshumo ya muzika nga aḽibamu yawe ntswa ya reggae Roswika.
Yo rekhodiwaho The Burning Shack Studios ngei Thohoyandou nahone yo itwa nga Mulalo Mukwevho, Ro swika i na nyimbo dza fumi-malo dzine dza ḓo vha na vhafuni vha muzika vhane vha swikelela zwienda zwavho zwa u tshina. Nyimbo dzothe kha aḽibamu dzo vha dzo vhumbwa nga Mutele, nga nnḓa ha Mulisa wa ndele na Soon and Very Soon, zwe a zwi vhumba na vhafunzi Vho Tshifhiwa Baloi.
Mutele, ane lufuno lwawe lwa vha kha muzika wa mafhungo madifha na wa reggae, a si muswa kha muzika. Lwendo lwawe lwa muzika lwo thoma Kerekeni ya Yerusalema ya Vhaapostola ngei Savhatha ngei Matangari, he a shuma sa murangaphanḓa wa khwairi u bva vhuṱukuni. Nga murahu ha u fhedza Gireidi ya 12, o ṅwalisa ṱhanziela ya muzika ya ṅwaha muthihi ngei Yunivesithi ya Venda. Nga ṅwaha u tevhelaho, nga 1996, vho thoma digirii ya muzika kha tshiimiswa tshithihi, tshe vha tshi fhedza nga 1999. Nga 2000, vho ṱhaphudza pfunzo dzavho dza pfunzo dza yunivesithi, vha tshi khou guda muzika.
Naho o shuma na vhaimbi vha sa vhalei sa mutambi wa zwilidzo, muṅwali wa muzika, muinzhiniyara wa mubvumo na mubveledzi, o dzula o wana tshifhinga tsha u livhisa ṱhogomelo kha muzika wawe. Miṅwahani yo fhiraho, o bvisa aḽibamu nṋa dza vhulapfu ho fhelelaho. Muzika wawe mulapfu wo ḓa nga murahu ha u bviswa ha Mihwalo i do rulwa nga 2011, he ha vha hu na luimbo lwa hit Duvha li dotsha. Nga ṅwambo wa mutsiko u bvaho kha vhafuni, o bvisa muṅwe, Funzani, nga 2020.
Sa pholisa ḽa tshifhinga tshoṱhe, Mutele o amba uri o ṱangana na milandu ya khakhathi dzo thewaho kha mbeu ḓuvha ḽiṅwe na ḽiṅwe. Musi a tshi amba na Limpopo Mirror, o ri: "Zwe zwa ita uri ndi rekhode na u bvisa Roswika ndi ṱhoḓea ya u tandulula khakhathi dzo thewaho kha mbeu, dze dza dzhia miṱa na vhutshilo nga u angaredza. Izwo zwo vha zwo livhiswa zwavhuḓi kha luimbo lwa Mathada, lune lwa sumbedza mbuno ya uri roṱhe ro dzhenelela kha nndwa na swina ḽithihi, ḽine ḽa vhidzwa Mathada (thaidzo), ḽine ḽa sa vhe na ndavha na uri ndi nnyi kana ndi mini. u mona na vhutshilo."
Mulaedza wawe kha vhane vha khou ṱoḓa u vha vhaimbi vhaswa vha re khagala: "Vhaswa vhane vha ṱoḓa u tevhela mushumo kha nḓowetshumo ya muzika vha fanela u thoma vha ya tshikoloni. Musi no funzea na u shuma, ni na zwiṅwe zwine na nga ḓitika ngazwo musi muzika waṋu [mushumo] u tshi rwa tshikwekwe."