Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Muhali wa kale wa mbumbano ya zwa mavili ya u mona na shango (IBF) na muhali wa Dzangano ḽa mavili Dzitshaka (IBO) Vho Isaac "Muruṅwa" Hlatswayo vha ḓo ita muṱaṱisano wavho wau thoma wa mavili sa muṱuṱuwedzi kha Malamulele Boxing Gym nga Mugivhela.
Musi vha tshi khou amba na vha nyanḓadza mafhungo ya Limpopo Mirror nga Swondaha, Vho Hlatswayo vho amba uri vho zwi limuwa uri Limpopo i na lupfumo lwa vhukoni ha zwa mavili fhedzi ndi vhaṱuṱuwedzi vha si gathi vhukuma, nga maanḓa kha vhupo ha Vhembe.
"Sa muthu a bvaho kha Tshiṱiriki tsha Vhembe na muhali wa kale wa ḽifhasi, ndi fanela u thusa vhatambi vha mavili vhane vha khou ḓa u wana nndwa nnzhi dza phurofeshinaḽa nga hune zwa konadzea ngaho u itela u khwinisa na u sumbedza vhahaṱuli uri vho ḓiimisela kha muṱaṱisano ya dzitshaka," vho amba.
Vho engedza nga uri nga tshifhinga tshavho, vhatambi vha nṱha vha mutambo wa mavili vha bvaho Vhembe vho vha vha tshi fanela u pfulutshela Gauteng u wana zwikhala zwa khwine.
"Vhatambi vha mavili vha ngaho nṋe, Cassius Baloyi na Phillip Ndou vho ṱutshela vunḓu iḽi u itela u khwinisa vhuimo hashu, nahone roṱhe ro fhedza ro wina zwiphuga zwa ḽifhasi. Zwino, 'The Angel's Boxing Promotions' i ḓo vhona uri vhatambi vha mavili vhapo vha ḓo wana tshikhala tsha u ṱaṱisana kha nndwa dza dzitshaka henefha kha Vhembe," vho amb.
Vhatambi vha mavili vha fumi rathi vha ḓo dzhenelela kha miṱaṱisano i ḓaho ya Rising of Stars, vha fumi-mbili vha bva Vhembe.
Musi vha tshi vhudziswa arali vha tshi ḓo katela vhatambi vha mavili vha vhafumakadzi kha miṱaṱisano ya tshifhinga tshi ḓaho, Hlatswayo vho ri vha ḓo shuma na vhanna na vhafumakadzi. "Ngoho, hu na vhukoni vhunzhi ha vhafumakadzi fhano Vhembe, nahone vhukuma ri ḓo vha ṋea tshikhala tsha u sumbedza vhukoni havho kha luvhanḓe lwa dzitshaka," vha engedza.