Tshiṱori: Silas Nduvheni. Ṱhalutshedzo nga: Khathutshelo Raliphaswa.
Vho MEC vha muhasho wa u vhusa nga u farisana, nzulele ya vhathu na sialala (CoGHSTA) wa Limpopo Vho Basikopo Makamu vho ṱahisa nḓila ine vha fulufhela ngayo vhurangaphanḓa ha Hosi Vusimuzi Nxumalo vha minwaha ya furaru-rathi vha kusi kwa Magona nga ḓuvha ḽa u ḓadzwa mativha nga Vho Nxumalo nga Ḽavhuṱanu ḽa u thoma Khubvumedzi.
Mativha a kusi kwa Magona o xa nga nwaha wa gidimbili fumbili-thihi musi hu tshi dzama Hosi Magona Nxumalo.
Vhaeni vhaḓivhalea vhevhadi vhonadza khamushumu uyo vha fanaho na neḓorobo wa masipala wa Vhembe,Vho Dowelani Nenguda, neḓorobo wa masipala wa Collins Chabane, Vho Shadrack Maluleke, Mudzulatshidulo wa nnḓu ya vharangaphanḓa vha sialala ya Limpopo, Hosi Pheni Ngove, na vhanwe vharangaphanḓa, hu tshi katelwa na vhaimeleli vha vhafaramikovhe.
Vho MEC Vho Makamu vho livhuwa Vho Nxumalo nga mushumo wavhuḓi une vha khou ita, une vho no ḓi u thoma kusini kwa Gidjane vha tshi itela u khwinifhadza kusi uko. "U dzhenelela havho kha u khwaṱhisa vhushaka vhukati ha vhadzulapo na u khwinifhadza mveledziso ya ikonomi ndi zwa vhuṱhogwa. Ndi ngazwo ri tshi sumbedza u ḓi imisela ho vuleaho kha vhurangaphanḓa ha vunḓu nga u dzulela u isa zwifhinga zwa u ṱangana navho na mivhundu yavho, zwihulu nga zwifhinga zwine ra pembelela maitele a fanaho na aya," vha amba.
Vho Nxumalo vha khou shuma vho ḓi imisela vha tshi ramba madzangano a muvhuso a fanaho na National Student Finance Aid Scheme uri vha funze vhagudiswa vha bvaho kha zwikolo zwa vhupo uho vhane vha shuma zwavhuḓi kha murole wa vhufumi-mbili. Mushumo uyo wo tshimbila zwavhuḓi lune wo thoma u shumiswa kha sekhethe ya vhubvaḓuvha ha Malamulele.
Vhadzulapo vha kusi kwa Gidjani vha khou ṱangana na dzi khaedu dza nḓisedzo ya tshumelo u fana na ṱhahelelo ya maḓi, na bada dzi sa tshimbilei zwavhuḓi, na themamveledziso zwikoloni na kha mihasho ya mutakalo. Vho Nxumalo vha fulufhedzisa u shuma na vha siviki na muvhuso uri vha tandulule khaedu idzi.