Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Nga vhusiku ha ḽa fumbili sumbe Fulwi, vhadzulapo vha Tshikhudini na zwisi zwa tsini na Ṱhohoyanḓou vho vuswa nga masinḓa mbilu a mafhungo zwi tshi tevhela u dzhena ha mavemu kha mavhengele tserekani a fhaḽa ha Matidza vha ṱangula mavhengele a tshivhalo.
Uya nga ha Mapholisa, mulindi wa tsireledzo e avha a khou shuma vhusiku uvho uri o pfa munwe wa vhashumisani atshi huwelela atshi ṱoḓa thuso nga tshifhinga tsha awara a vhu fumithihi madekwana. Mulindi uyu ori u swika a wana huna vhahumbulelwa vhaṱanu vhane vhasa ḓivhei vhe vhavha homboka vha vha vhofha zwanḓa nga thambo dza zwienda. Ha swika vhanwe vhahumbulelwa vhavhili vho vhofha munwe mulindi wa tsireledzo. Mavemu vho ṱangula vhalindi ṱhingokhwala dzavho vha vha honela lufherani lwau rotholaho, ngeno munwe wa mavemu ayo ovha oḓi ṱama nga tshigidi, vha bvela phanḓa nau ṱangula mavhengele tserekani.
Hori nga murahu ha awara dzi swikaho tharu, hono dzika hu sina phosho, vhalindi avho vha wana tshikhala tshau bva lufherani lwe vhavha vho valelwa khalwo.
Vho Sedzheni Vho-Vuledzani Dathi vhane vhavha muambeli mufareli wa vhashumela tshitshavha vha SAPS, vho khwaṱhisedza uri ho kwashiwa mavhengele a fumi. Zwishumiswa zwe zwa ṱangulwa zwo bviswa nga gethe ḽa murahu ha mavhengele tserekani, vhahumbulelwa a vha khou ḓivhea zwa zwino. Ho vulwa mulandu wa u ṱangulwa huna zwigidi nau ṱangula mabindu, nga mapholisa.
Vhunzhi ha mavhengele ovha o valwa nga Lavhuraru zwi tshi tevhela u ṱangulwa uhu, zwe zwa sia vhadzulapo na vharengi vho sinyuwa nau bilufhala. Vhamusanda Vho-Vusulusani Watson Maraganenzha, vho sumbedzisa usa farea zwavhuḓi havho nga tshiwo itshi. Vhunzhi ha vhadzulapo vha renga kha mavhengele ayo sa izwi vha sa koni u swikelela masheleni a uya ḓoroboni u fana na Ṱhohoyanḓou na Sibasa, fhedzi vhovha vha tshi kona u touya kha mavhengele ayo vha songo shumisa masheleni.
Ane avha na vhuṱanzi vhune hanga thusa kha mulandu uyu vha nga kwama muofisiri wau ita dzi ṱhoḓisioso, vho sedzheni Vho-Takalani Mulaudzi kha nomboro dza 082 487 6319 kana kha 015 960 1000.