Ho farwa khampheini ya tsireledzo ya vhaenda nga nayo kha N1 Musina.

Tshiṱori nga vha Road Safety. Ṱhalutshedzo nga: Khathutshelo Raliphaswa.

Vhupo hau pfukha gondo ḽa N1 tsini na Skoonplaas, Musina hu vho vhonala sa tshivhilelana tsha khombo dzine vhaenda nga nayo vha dzulela u ṱangana nadzo hone vha fanela uvha na vhusedzi musi vha tshi pfuka fhethu afha.Vhunzhi ha vhaenda nga nayo vho no thulwa vha tshi fhira kha gondo iḽi nga mimoḓoro ine vhareili vhavha vha khou reila nga luvhilo lwo kalulaho, zwo no sia vhunzhi ha vhaendi avho vho lovha vhanwe vho huvhala.

Inwe khombo ye ya itea ndi ye ha thulwa Atendaho Ndou, mugudiswa we avha atshi dzhena gudedzini ḽa Vhembe TVET ngei Musina, we a thulwa mureili a shavha ṅwedzi wo fhelaho.

Vha muhasho wa bada na vhuendi na vha Masipala wa Musina vho dzudzanya bembela kha gondo iḽo vhege yo fhelaho.Bembela ili lo dzhenelelwa nga vhaimeleli vha madzangano o fhambanaho, tshitshavha, vhafaramikovhe, vhareili kha dzi thekhisi na vhagudiswa vha zwikolo zwo fhambanaho kha vhupo uho.

Mulangi wa vhuendi kha Masipala wa Musina, Vho-Ailwei Mutele, vha ṱalutshedza uri ndi ngani tsireledzo ya vhaenda nga nayo iya vhuṱhogwa. "Khombo dze dza bvelela kha gondo iḽi dzovha dzi tshi nga thivhelea. Izwi ndi ngauri vhunzhi ha vhareili, kha vhunzhi ha dzi khombo, vha thula vha sia vhaenda nga nayo vhe vhuṱunguni kana vho lovha. Sa muvhuso, ro vhona zwo fanela uri ri thuse vhaenda nga nayo na vhareili uri vhavhe vho tsireledzeaho kha gondo iḽi."

Vho-Mutele vho sumbedzisa nḓila yau pfuka bada. "Vhaenda nga nayo vha fanela u dzulela u pfuka bada fhethu ho nwalwaho uri ndi hau pfuka vhaenda nga nayo. Vha fanela u sedzana na vhareili vha saathu u pfuka. Hone muthu a thi pfuka bada ha faneli u gidima sa izwi a tshi nga huvhala nga uwa kana u thulwa,"

Vha dovha hafhu vha eletshedza vhaenda nga nayo uri vha dzulele u tshimbila nga matungo a bada. "Vhaenda nga nayo vha eletshedzwa uri vha dzulele u ambara zwiambaro zwi vhonalaho nga masiari. Hone musi vha tshi tshimbila nga madekwana, vha ambare zwiambaro zwine zwa penya. Izwi ndiu itela uri vhareili vha vha vhone zwavhuḓi dzi badani vha tshe kule."

Mureili wa thekhisi vhuponi uho, Vho-Patrick Ndou vho ṱanganedza bembela ili. "Ri livhuwa vhathu vho konaho u dzudzanya bembela ili. Ndi tenda uri iḓo thusa khau vhulunga vhunzhi ha matshilo a vhathu," vha amba izwi vha tshi pfuka bada vhasi ha vhulangi ha vhaofisiri vha muvhuso.