Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Muta wa murangaphanda wa sialala o vhulawaho u bva muvhunduni wa Gumbu kha vhupo ha Niani wo tanganedza u farwa ha vhanwe vhahumbulelwa vhavhili, u zwi vhidza vhukando ha u vala.
Vhamusanda Vho Andries Takalani Gumbu (40) vho ṱhaselwa vha thuntshwa nnḓa ha hayani havho nga ṅwedzi wa Luhuhi 2023 nga tshifhinga tsha awara ya 22:00. Vho wanala vhe na mbonzhe nnzhi dza u thuntshwa nahone vha ḓivhadzwa uri vho dzama henefho fhethu.
U vhulawa havho zwo vusa migwalabo ya vhuvemu henefho fhethu, nga tshifhinga tshe ha vha hu na zwifhaṱo zwo vhalaho na veni ya mapholisa. Miraḓo ya tshitshavha yo vhalaho yo farwa malugana na khakhathi nahone vha kha ḓi ḓivhonadza khothe.
Nga murahu ha ṱhoḓisiso dza tshifhinga tshilapfu na dzo khwaṱhaho, mapholisa vho fara vhahumbulelwa vhaṋa vhukati ha Khubvumedzi 2023 na Lambamai 2025: Ramphabana Oscar (39), Rolivhuwa Ronald Ramaqno (34), Mulalo Masakona (42) na Lodwick Mahangwahaya (37).
Kha u bvelela huhulwane, mapholisa zwenezwino vho fara muṅwe wa vhahumbulelwa vhane vha khou ṱoḓea vhukuma, Salani Duncun Mudau (43), we a wanala o dzumbama muvhunduni wa Dzwerani tsini na Vuwani nga Swondaha, ḽa 29 Fulwi.
Vhege yo fhiraho, mapholisa vho ita mvelaphanḓa yo engedzeaho musi vha tshi fara vhafumakadzi vhavhili vhane vha tenda uri vho vha vho no vha na vhukoni ha u vhulaha nga u ṋetshedza masheleni kha. Vhafumakadzi vho farwa ngei Manenzhe Bale na Masisi nga u tevhekana.
Vhahumbulelwa, Ronewa Eunice Mukwevho (46) na Mavis Ramphabana, vho ḓivhonadza khothe ya madzhisiṱaraṱa wa Musina nga Musumbuluwo, ḽa 28 Fulwana. Mulandu wavho wo fhiriselwa phanḓa nga ḽa 6 Ṱhangule uri vha kone u ita khumbelo dza beiḽi.
Mufumakadzi wa murangaphanḓa wa mvelele o dzamaho, Vho Rudzani Mugobi, vho amba uri naho u farwa ho vula hafhu zwilonda zwa kale, muṱa wo vhofholowa uri dziṅwe mbudziso dze dza vha dzi sa fhindulei lwa tshifhinga tshilapfu dzi nga fheleledza dzo tandululwa.
"Hezwi ndi tshiṅwe tsha zwifhinga tshi vhaisaho vhukuma vhutshiloni hanga. Vhuṱungu vhune nda vha naho vhu ḓo fhola fhedzi musi vhathu vha re na mulandu vha tshi gwevhiwa.Tshipiḓa tshivhi tshazwo ndi tsha uri ro ṋea mapholisa madzina e mufarisi wanga vha a amba phanḓa ha musi a tshi fhiriswa fhano shangoni, fhedzi vho kokodza milenzhe yavho kha u vha fara. Hu kha ḓi vha na vhaṅwe vhahumbulelwa vha sa athu u farwaho kha mulandu, fhedzi ri na fulufhelo ḽa uri vha ḓo farwa hu si kale," vho ralo.