Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Vhatakaleli vha muzika vha vhupo ha Vhembe vhovha na ḓuvha ḽi takadzaho hu tshi rwelwa ṱari vhuṱambo ha October Fest ha u thoma, vhune ha ḓovha ha ṅwaha na ṅwaha. Vhuṱambo ha u rwela ṱari ho farelwa News Cafe ire moḽoni wa Thavhani nga madekwana a Mugivhela wa ḽa fumbili-rathi Ṱhangule. Vhaṱaleli vha fhiraho maḓana maṱanu vho mvumvuswa nga vhoramuzika vho fhambanaho, khavho hu katelwa na mutshini na ramuzika ane a vhidzwa 'Khosikadzi ya Amapiano' Kamogelo Mphela, ane a ḓivhea nga ḽa Kamo Mphela kha nḓowetshumo ya muzika.
Vhuṱambo uvhu ho dzudzanywa nga vha Marshal Nation, ye ya tumbulwa nga ramabindu a ḓivheaho Vho Robert Mashau na muimbi Mizo Phyll nga ṅwaha wa 2022.
Vhuṱambo uvhu asi ha u ṱumanya vhathu vha tshaka dzo fhambanaho fhedzi, vhu dovha hafhu havha ha u ṋea vhathu tshikhala tsha u pembela u fhambana ha dzi tshaka na muzika, na u alusa kutshilele kwa khwine.
Mulangi wa Marshala Nation, Vho Zwivhuya Nemaungani, vhari vhuṱambo uvhu vhu dovha hafhu havha tshiendedzi tsha u fhaṱa vhukonani vhukati ha vhathu na u bveledzisa ikonomi ya vunḓu ḽa Limpopo nga kha vhuendi. "Marshal Nation yo sikwa hu na ndivho ya u maanḓafhadza na u bveledza vhukoni ha vhanzhi kha vhupo hashu," vha amba. Vhoramabindu vhapo vha ḓo wana tshikhala tsha u bveledza zwibveledzwa zwavho na u rengisa zwibveledzwa zwavho, zwi fanaho na zwiḽiwa, zwiambaro, na vhare na vhutsila vha dovha vha khou sumbedzisa vhutsila havho nga nḓila dza u fhambana kha vhuṱambo uvhu.
Mizo Phyll uri vha ḓi pfa vho takala vhukuma nga nḓila ye u rwela ṱari uhu ha tshimbila ngayo. "Ro lindela u vhona vhuṱambo ha October Fest ine ya ḓo farwa nga ṅwedzi wa Tshimedzi. Hone ri khou takadzwa na nga vhoramuzika vhane vha ḓo mvumvusa vhathu, kha vhe vha bulwa uri vha ḓovha vhe hone, ndi na fulufhelo uri vhathu vha ḓo fushea nga mizika yavho," Mizo a amba.
A tshi engedza Mizo Phyll uri vhupo ha Vhembe, na shango ḽoṱhe nga u angaredza, ho ḓala vhaswa vhare na vhukoni vhane vha ṱoḓa zwikhala zwa uḓi bveledza, fhedzi zwishumiswa zwine zwavha hone azwi swikeleli. Mizo Phyll uri, "ro ḓi vhudza u takula vhaswa na u sika tshikhala tshine tsha ḓo vala ḽiga ḽine ḽavha hone vhukati ha vhoramuzika vha hayani, vha lushaka na vha u mona na ḽifhasi, vhatsila, na vha ndowetshumo ya muzika."