Tshiṱori nga Silas Nduvheni. Ṱhalutshedzo nga Khathutshelo Raliphaswa.
Mveledziso ya Ḓorobo ya Nkuna Smart i re na vhuḓiimiseli i khou ḓi ṋaṋa u aluwa, nga hekhithara dza mavu dza 120 dzo engedzwaho dza 120 dzo engedzwaho kha mushumo u ḓuraho masheleni a paḓaho R6 biḽioni. Musi yo no fhela, mveledziso i ḓo katela hodela, senthara dza mavhengele, zwiimiswa zwa pfunzo, vhuongelo ha phuraivethe, garatshi, senthara ya maguvhangano, khathihi na fhethu ha vhudzulo na ha nḓowetshumo.
Vhege yo fhiraho, ho sainiwa memorandamu wa u pfesesana vhukati ha Tshigwada tsha Masingita, vhabveledzi vhahulwane, na Masipala wa Tshiṱiriki tsha Vhembe na Masipala wapo wa Collins Chabane. Vhuṱambo ha u sainiwa, ho farwa nga Ḽavhuvhili, ḽa 4 Ṱhafamuhwe, ngei VDM Council Chambers, ho vha ho dzhenelwa nga vhahulwane vha si gathi, hu tshi katelwa na mulangavundu wa Limpopo Vho Dokotela Phophi Ramathuba.
Ḓorobo ya Nkuna i wanala muvhunduni wa Nkuzana, tsini na Hamasia, nahone ndi yone ine ya vha na muhumbulo wa ramabindu a ḓivheaho na mubveledzi Vho Dr Mike Nkuna. Nga tshifhinga tsha u ṱalutshedza nga ha nyanḓadzamafhungo, vho amba uri mushumo wo vha wo no sika mishumo minzhi nahone wo vha u tshi khou lavhelelwa u bveledza miṅwe minzhi. Vho dzhiela nzhele uri nga tshifhinga tsha u thoma tsha u fhaṱa nga 2021, ho vha ho no vhetshelwa masheleni a linganaho R50 miḽioni. Nga u engedzwa ha zwenezwino, hu ḓo dzheniswa hekithara dza 120 dzo engedzwaho u itela u ṱanganedza ṱhoḓea dza mveledziso dzine dza khou aluwa.
Uya nga ha Vho Nkuna, mushumo wo vha lwendo lulapfu lwe lwa thoma minwaha ya 12 yo fhiraho. Vho ombedzela uri mveledziso ya Nkuna Smart City yo sumbedzisa nḓila ine nyimele dza matshilisano na ikonomi kha vhupo ha mahayani dza nga khwinisa ngayo musi muvhuso na vhabindudzi vha phuraivethe vha tshi shumisana.
Mulangavunḓu wa Limpopo Vho Dokotela Phophi Ramathuba vho fhululedza Vho Nkuna kha vhuḓidini havho ha u isa phanḓa na u bveledza dzingu na u shandukisa Ḓorobo ya Nkuzana ya vha Ḓorobo ya musalauno. Vho sumbedzisa fulufhelo ḽa uri vhufarisani vhukati ha Tshigwada tsha Dzikhamphani tsha Masingita na mimasipala mivhili zwi ḓo bveledza mvelelo dzavhuḓi.
"Na Nkuna Smart City, humbulani fhedzi u vha na zwibadela zwaṋu na zwikolo zwa vhana vhaṋu. Ndi mini zwine zwa nga ri thivhela u fhaṱa Sandton yashu fhano Nkuzana arali ri na vhabindudzi vha fanaho na Tshigwada tsha Masingita tsha Khamphani dzine dza ṱoḓa u bindudza? Kha ri engedze mivhundu yashu, ri fhaṱe ḓorobo dzashu, na u sika mishumo zwitshavhani zwashu," hu amba Vho Dokotela Ramathuba.