Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Zwiwo zwa u ṱangulwa zwi khou hulela vhuponi ha Vhembe zwine vhunzhi hazwo zwi sia matshilo a vhathu o lozwa. Kha vhupo ha Madombidzha, zone 4, nga madekwana a Sondaha, ḽa fumbili-sumbe, ho thuntshwa mulindi wa tsireledzo wa DRS, Vho Vincent Sivhada vha minwaha ya furaru-nṋa. Zwa zwino mapholisa a Tshilwavhusiku vha khou zwimana na vhahumbulelwa vhararu vhe vha ita tshiwo itsho.
Uya nga vholuthanenthe kholonele Malesela Ledwaba, vhane vha vha muambeli wa mapholisa a Limpopo, Vho Sivhada vho vha vhe mushumoni nga tshifhinga tsha tshiwo. Vho Sivhada vhovha vho paka moḓoro wa khamphani tsini na vhengele ḽa kholekhole, ha swika vhanna vhararu vha sa ḓivhei vha ṱangula moḓoro uyo vha fhedza nga u thuntsha Vho Sivhada vha lovha. "Mapholisa vho vhigelwa nga ha tshiwo itsho, vhari vha tshi swika na vha tshumelo ya shishi, vha wana Vho Sivhada vho edela kha tivha ḽa malofha, hu na gulu dzi sina tshithu, vha bula Vho Sivhada sa muthu ane ha tsha tshila," Vha amba Vho Ledwaba.
Nga Musumbuluwo wa ḽa fumbili-malo Ṱhangule, ho wanala veni iyo ye yavha yo ṱangulwa yo laṱwa mafhandeni a Tshiozwi na Madombidzha. Mapholisa vho vula mulandu wa u vhulaha na u ṱangula moḓoro. Vhahumbulelwa avha ḓivhei zwa zwino, fhedzi mapholisa vha khou sedzulusa tshivhangi tsha tshiwo itshi na u zwimana na vhahumbulelwa.
Mukomana wa Vho Sivhada, Vho Melton Sivhada, vho vhudza vha nyanḓadza mafhungo vha Limpopo Mirror uri vho wana ṱhingo u bva kha muthu we avha luma nḓevhe uri vha ḓe he tshiwo tsha bvelela hone. "Ndo ḓi vhudziso mbudziso nnzhi dzi sina phindulo. Naa murathu wango ovha o tshinya mini kha vhanna avho lwe vha vhona u mu vhulaha zwi zwa khwine? Ndi tama uri vha farwe, uri vha kone u ri fhindula mbidziso dzine ra vha nadzo. O lovha sa tshifuwo kana ḽivemu, ngeno huuri ovha e muthu a tshilaho zwavhuḓi na vhanwe vhathu. Ri khou ṱoḓa u vhona tshanḓa tsha mulayo musi vhanna avho vha tshi farwa," vha amba vha tshi lila.
Musumi wa DRS ire Tshitandani, Vho Alfred Mahafa, vhari vha khou isa ndiliso dzavho vhoimelela khamphani kha muṱa na dzi ṱhama vho welwaho. Vhari vha fulufhela uri mapholisa vha do shuma zwavhuḓi uri vha fare mavemu ayo.
Mukhomishina wa mapholisa a vunḓu ḽa Limpopo, Vholuthanenthe Thembi Hadebe, vha khou huwelela kha vhane vha ngavha vhe na vhuṱanzi ha u thusa kha mulandu uyu uri vha lume mapholisa nḓevhe uri vhahumbulelwa vha farwe.
Are na zwidodombedzwa zwine zwa nga thusa mapholisa kha u fara vhahumbulelwa avha, anga kwama muofisiri wa tsedzuluso vho Mawela Patrick Tshikhudo kha 072 745 4908 kana 015 519 6000, vha founela nomboro dza shishi dza u thivhela vhugevhenga kha 08600 10111, vha dalele tshiṱitshi tsha tsini navho, kana vha dalele epe ya MysapsApp.