Tshiṱori nga Silas Nduvheni. Ṱhalutshedzo nga Khathutshelo Raliphaswa.
Naho Phuresidennde Vho Cyril Matamela Ramaphosa vha songo koni u dzhenela vhuṱambo uyo muvhunduni wa Mafheloni a vhege o fhiraho he ha vha ho vhewa murangaphanda muswa wa sialala, vho kona u rumela Vhamusanda dzi kholomo dzavho dza Ankole dza ndeme sa mpho/tshifhiwa kha Vhamusanda. Muvhundu wa vhomakhulu wa Vho Ramaphosa ndi muvhundu wa Khalavha, nnḓa ha ḓorobo ya Thohoyandou.
Murangaphanda muswa wa sialala, Vhamusanda Miri i avhavha Tshivhase, vho rwelwa ṱari nga tshifhinga tsha mushumo wo ḓalesaho nga Mugivhela wa ḽa raru Shundunthule. Muphuresidennde Vho Ramaphosa vho imelelwa nga Vhamusanda Livhuwani Matsila na Minisita kha ofisi ya vhuphuresidennde, Vho Khumbuddzo Ntshavheni.
Vhamusanda Matsila vho eletshedza murangaphanda muswa uri vha dzule vha tshi khou ita zwithu zwine zwa nga vhuyedza tshitshavha tshavho nga u ranga phanḓa dzithandela dzine dza sika mishumo na u alusa ikonomi yapo. "Ndi khou humbela uri vha range phanḓa nga tsumbo na u shumela tshitshavha tshavho nga tshirunzi, u ḓikukumusa na u ḓikumedzela," Vho Matsila vha zwa.
Vhamusanda Miri i vha Vhavha Tshivhase vha tshi khou ḓadza mativha e a xa musi mune avho vho , Vhamusanda Mpfuneni Vho Tshivhase, vha tshi dzama nga 2024. Nga tshifhinga tsha vhutambo, Vho Anza Tshivhase vho nangiwa nga dzina ḽiswa ndumi, ngeno Vho Fulufhedzani Tshivhase vhe vhone khadzi zwa zwino.
Thovhele Midiyavhathu Tshivhase, vhe vha vha vha tshi khou tshimbidza maitele vhone vhaṋe, vho ṱalusa murangaphanḓa muswa wa sialala sa muthu ane a shuma nga maanḓa, o ḓiimisela u shumela tshitshavha tshavho. "Ndi nga ni khwathisedza, hu si kale muvhundu wa Khalavha u do shanduka zwa vha zwa khwine, u wana tshumelo dza khwine na u vha na thikhedzo khulwane kha mafhungo a pfunzo. A hu nga vhi na vhaswa vha sa shumiho vha tshi khou mona mona zwiṱaraṱani Khalavha hu si na mishumo," ndi vho Tshivhase.
Vho zwa zwauri dzingu ḽi ṱoḓa vhaswa vhane vha ḓitika nga vhone vhaṋe, "vha tshi funza u rea khovhe, u itela uri vha kone u ḓi-vhuelela".
"A ri ṱoḓi vhutshinyi vhu ngaho u tswa na u tswiwa, mabulayo a mikhuvha na u thubiwa ha vhathu zwi tshi khou itea fhano, sa izwi ni na murangaphanḓa muswa wa sialala o funzeaho ane a ṱoḓa u ṱuṱuwedza vhaswa vhawe uri vha dzhiele nṱha pfunzo," Vho Tshivhase vha zwa vha tshi engedza.
Vhamusanda Miri i Vhavha Tshivhase vho vhudza vhoramafhungo nga murahu ha vhuṱambo uri vha na phuphu tharu dza u bveledza muvhundu: mveledziso ya themamveledziso, maḓi o kunaho kha dziphaiphi, na tswikelelo ya inthanethe i fulufhedzeaho, u itela uri vhaswa vha kone u shumisa u guda nga inthanethe mahayani avho. Vho zwa uri mishumo ya mvelele, mveledziso ya mitambo na pfunzo zwo vha zwi tsini na mbilu yavho.