Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Bupho ḽiṱuku ḽo wa kha muvhundu wa Hamasakona nga Lavhuvhili nga awara ya vhusumbe nga mastheloni. Bupho iḽo ḽovha ḽi khou bva kha iṅwe ya dzi bulasi dza ZZ2 ngei Moeketsi ḽi tshi livha Musina musi ḽi tshi ṱangana na khaedu dza zwakheniki hezwa vha kombetshedza mutshimbidzi wabupho u kavha lwa tshihaḓu. Bupho iḽo ḽovha ḽo hwala vhathu vhaṋa, mashudu mavhuya ahuna we avha o huvhala. Vhadzulapo vho ḓou bva nga vhunzhi vha tshi lingedza u thusa, mashudu mavhuya vha wana uri vhanameli vhovha vha songo huvhala.
Ṱhanzi ye ya zwi vhona nga maṱo, Vho Ndzalama Tsuvuka, vho amba zwauri bupho iḽo ḽo wa nga luvhilo he ḽa wa ḽa kwashekana. "Muṅwe na muṅwe ovha a khou gidima a tshi ya he khombo yabvelelela hone, hone zwovha zwi zwithu zwi sa athu u vhonwa kha muvhundu washu zwe zwa sia vhunzhi hashu ro shushea," vha amba.
Muambeli wa vhuendi na tsirelezo ya vhathu fhano Limpopo, Vho Tidimalo Chuene vho khwaṱhisedza tshiwo he vha amba zwauri: "mureili wa bupho o lingedza u kavha zwi tshi tevhela khaedu ya zwa kheniki, ndi he a rwa muri. Hovha hu na vhathu vhaṋa kha bupho, hu tshi katelwa na mureili wa bupho. Muṅwe munameli ovha o huvhala zwiṱuku kha ṱhoho," vha amba.