Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
U ngalangala ha vhathu vhuponi ha Vhembe zwi vhonala zwi zwithu zwine zwa khou nana zwi tshi ya. Ṅwedzi wo fhelaho, ho waniwa zwithu zwa vhune zwa vhathu vhe vha ngalangala, hone na vhege yo fhiraho, ho waniwa zwithu zwa vhune zwa musidzana we a ngalangala maḓakani a Thathe Vondo fhedzi hu sina tswayo yawe.
Zwithu izwo zwe zwa waniwala ndi zwa Hulisani Shaleen Mafeladzulo wa minwaha ya fumbili-ṱhanu a bvaho Duthuni, nnḓa ha Ṱhohoyanḓou we a ngalangala e ndilani ya uya mushumoni nga Musumbuluwo wa ḽa fumbili-ṱhanu Khubvumedzi.
Mme a Hulisani, Vho Thivhakoni Mafeladzulo, vhari tshifhinga tshe vha fhedzisela u vhona Hulisani ndi nga matsheloni a ḓuvha ḽe a ngalangala a tshi laela uri u khou ya mushumoni mavhengele tserekano a Thavhani, Ṱhohoyanḓou. " A sa athu u ṱuwa, u mmbudza uri o dzudzanya tshiendedzi tshine tsha ḓo mu endedza u ya mushumoni. Nga hone u sa ḓivha uri hango swika mushumoni, ndo mu rumela mulaedza uri a vhuye na mageu. Nga murahu ha tshifhinga ndo ḓou vhona uri ṱhingokhwala dzawe dzo tsimiwa. Zwe zwa mbaisa ndi musi ndi tshi vhudzisa mureili wa thekhisi uri o vhona Hulisani naa, a mphindu nga nḓila i sina ṱhonipho, naho nne ndovha ndo ḓi ṱukufhadza khae," vha amba.
Vho Thivhakoni vhari sa muṱa vho lingedza u mu ṱoḓa hoṱhe hune vha nga humbulela, fhedzi vha si mu wane, ahuna muthu ane o no mu vhonaho. Vho fhedzisela nga u vhiga mapholisani sa muthu o ngalangalaho.
Nga Ḽavhuṱanu ḽa fumbili-ṱahe, vhanwe vha vhadzulapo vho dovha hafhu vha lingedza u mu ṱoḓa maḓakani a Thathe Vondo. Afho ndi he vha wana garaṱa yawe ya vhune, bege yawe, na zwienda zwawe.
"Ri vhuṱunguni, Hulisani u na vhana vhavhili vhane vha dzulela u vhudzisa uri mme avho vha ngafhi, zwa zwino a ri tsha ḓivha uri ri vha vhudze mini. Ro vhaisala nga u wanala ha zwithu zwawe maḓakani. A ri khou ḓivha uri hu ḓovha ho itea mini khae a nḓilani ya u ya mushumoni, fhedzi ri na fulufhelo ḽauri ri ḓo mu wana a kha ḓi tshila. Ringa takala arali mureili wa thekhisi a thoma u shumisana na mapholisa zwavhuḓi, zwi nga ri thusa vhukuma." vha amba.
U ngalangala ha vhathu zwi khou dzhenisa nyofho kha vhadzulapo vha mivhundu ya vhupo ha Vhembe.
Muambeli wa mapholisa, muofisiri Vho Vuledzani Dathi, vho khwaṱhisedza uri ho vuliwa mulandu wa muthu o ngalangalaho, zwi tshi tevhela u ngalangala ha Hulisani.