Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
U wanala ha masalela a muthu na zwiambaro zwi fanaho na zwa Vho Naledzani Makhado vha Vyeboom vhe vha ngalangala minwaha mivhili yo fhiraho zwo sia vha muṱa wa havho vho laṱa fulufhelo ḽauri vha nga dovha vha wanala vha kha ḓi tshila.
Vho Makhado vhe vha vha vhe na minwaha ya fuṱhanu-mbili vho fhedzisela u vhonwa vha tshi bva muḓini wa mufunwa wavho Hamamngilasi nga ḽa fumi Khubvumedzi 2021 vha tshi fanela u ya mushumoni vhuongeloni ha Kurhuleni, fhedzi vha si swike mushumoni. Vha muṱa na mapholisa vho lingedza u vha ṱoḓa fhedzi vha si wanale. Naho zwo ralo, vha muṱa wa havho vho vha vha tshe na fulufhela uri vha ḓo vha wana vha kha ḓi tshila.
Masalela ayo o wanwa nga mulisa a bvaho kusini kwa Dzwerani. Vhari vhovha vha khou lingedza u phulusa kholomo yavho musi vha tshi wana masalela ayo tsini na mulambo wa Luvuvhu nga Musumbuluwo wa ḽa fumi-thihi Khubvumedzi ṅwaha uno. Vha muṱa vho tou salelwa nga masalela na bege ya zwiambaro zwa Vho Makhado.
Muambeli mufareli wa SAPS ya Vhembe, Vho Vuledzani Dathi vho khwaṱhisedza zwe zwa waniwa vhari hone mulandu uyu u khou sedzuluswa nga mapholisa a Vuwani.
Khaladzi a Vho Makhado, Vho Muhali Ndou, vhari u wanala uhu zwo vhaisa vha muṱa vhukuma. "Rovha ri tshe na fulufhelo uri khaladzi anga vha nga waniwa vha kha ḓi tshila vha ri vhudza uri lwa minwaha iyo mivhili ho itea mini, fhedzi a zwo itea. Ro khwaṱhisedza uri ndi khaladzi anga nga u vhona bege yawe ṱhukhu na zwiambaro, zwe zwa khwaṱhisedzwa nga mushumisani wavho. Zwa zwino ro lindela mvelelo dza ndingo dzi tshi vhuya. Ndingo idzo dzi ḓo itwa ho vhambedzwa na munwe wa ṅwana wavho muthihi. Ri ḓo dovha hafhu ra lindela," vha amba.
Vho Ndou vha khou humbela mapholisa uri vha shume nga hune vha nga kona uri vha kone u fara mupondi wa khaladzi avho. "Zwa zwino ho no touvha mulandu wa bulayo, ri tama uri o zwi itaho a vhonane na tshanḓa tsha mulayo, uri na rine sa muṱa ri vhe na phodzo ri bvele phanḓa na matshilo ashu. Mapholisa vha na mitevhe ya ṱhingo dza khaladzi anga, zwine zwa nga leludza u wana mupondi," hu amba Vho Ndou.