Ṱhalutshedzo ya tshiṱori nga Khathutshelo Raliphaswa
Nga Lavhuṋa ḽa vhege yo fhiraho (29 Thangule), musi ṅwedzi wa vhafumakadzi u tshi ya u fhela, vhathu vhovha ṱhanzi dzau vhona zwe muṅwe wa vhafumakadzi vhane ndi vhoramabindu a bvelela zwine zwo vulela vhanzhi mavothi kha vhupo ha Ṱhohoyanḓou. Mune wahodela iyo ntswa Premier Hotel Thohoyandou, yo ḓura masheleni a paḓaho miḽiyoni dza maḓana mavhili hone ndi ine vho ḓi imisela u sika luṱa luswa lwa vhuendelamashango kha tshiṱiriki tsha Vhembe.
Hodela iyo i na phera dza 120 hone i fhasi ha dzi hodela dza maimo na fhethu hau netulusa mivhili. Mune wa hodela iyo ndi mufumakadzi ane ndi ramabindu Vho Tsakani Masia.
Ndi fhethu hune ho dzhia tshipiḓa tsha mavu tshi swikaho mithara dza 8,700 hone ndi ṱhanganyelano ya mavhaivhai na hune ha swikelelea nga vhanzhi.
Ndi fhethu hune vhathu vha ḓo hu shumisa kha mabindu avho na vhaendela vhupo vha ḓo shumisa sa vhuawelo, hone hu nga fhelela vhathu vha paḓaho 450 nga ngomu. Hu katela na phera dza vhoramabindu, fhethu ha u ṅwa mahalwa na fhethu hau lela, vhupo hau bambela na hone fhethu hau ita dzinḓowe-nḓowe ha tshi zwino zwino.
U vulwa ha hodela iyi zwi touvha vhuṱhakheni ha vhuṱhogwa, kha sekhithara ya zwa mabindu na kha vhupo ha tsini. Ho sika mishumo ya tshoṱhe ya 85 kha vhulangi hau fhambana afho hodelani, na misumo ya tshifhinganyana i paḓaho 40 na vhane vha shuma nga zwifhinga zwine zwa ḓo khwinifhadza ikonomi ya vhupo uho. Hu sa athu u vuliwa, mushumo wo kona u sika mishumo ya tshifhinga nyana i paḓaho 400 nga tshifhinga tshau fhaṱiwa.
Hodela iyo yo fhaṱiwa nga masheleni a paḓaho miḽiyoni dza 194, he miḽiyoni dza 141 ho shumiswa ye ya lambedzwa nga vha Industrial Development Corporation (IDC) hone iyo yo salaho ho lambedza muṅwe wa hodela. Mune vha hodela iyi vha dovha hafhu vha imelela kana uvha mune wa hodela khulwane kha vunḓu ḽa Limpopo.
"Zwovha zwi zwavhuḓi u neiwa tshikhala tsho khetheaho nga vha Premier Group uri ndi shume navho kha zwa thekiniki nga tshifhinga tshau fhaṱiwa ha hodela na musi ho no fhela. Ro humbela vhushaka ha vhubindudzi khavho vhune vhovha vha sa athu uvha naho, he vha ḓou tenda," Vho Masia vha amba.
"Ro dovha hafhu ra takalela nḓila ye vha IDC vha lambedza ngayo. Hezwi zwi tendela uri huvhe na vhushaka havhuḓi kha shango ḽashu kha zwine vha khou ṱoḓa u maanḓafhadza vhafumakadzi kha zwa vhoramabindu," vha engedza.
Mushumo wau vula hodela iyo wo dzhenelelwa nga vhaofisiri vhahulwane vha muvhuso na vhaṅwe vho ramabindu, hu tshi katelwa na mulangavunḓu wa Limpopo Dr Phophi Constance Ramathuba, MEC wa pfunzo Limpopo Vho Mavhungu Lerule-Ramakhanya, ṱhoho ya tshikolo Yunivesithi ya Venda Prof Bernard Nthambeleni na muhaṱuli Vho Thembile Joyini vha dzulo ḽa Law of the sea.
(Zwidodombedzwa zwo ḓiswa nga Mulalo Mathelemusa o imela Premier Hotel Thohoyandou)