Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Lwa minwaha mivhili yo fhiraho, muhashi wa radio ya lushaka ya SABC Humbulani Muphirimia Nengovhela vho novha muṅwe wa vhonkhetheni kha pfufho dza South African Traditional Music Awards (SATMA) fhedzi avha athu u thuba tshiphuga na luthihi. Ṋaṅwaha, vho wela kha u khethwa kha tshiteṅwa tsha muzika wa khwiṋe wa muzika wa sialala: muhashi wa radio wa SABC wa ṅwaha wa khwine. Izwi zwi ta minwaha ya fumi-ṱahe ya pfufho dza dzi SATMA.
Mvelele dza muṱaṱisano kana mbambe iyi ndi dzine dza ḓi sendeka nga kha u voutha ha tshitshavha, hune ha ḓo vala nga ḽa fumbili-ṱahe Ḽara, ngeno ḓuvha ḽa vhuṱambo ha pfufho hu ḽa furaru Ḽara hone vhuṱambo vhu ḓo farelwa fhaḽa ḓoroboni ya Durban.
Muphirimia, vhane vha dovha hafhu vhavha mutumbuli wa tshiimiswa tshine tsha tikedza vhathu vhane vha tshila na vhuholefhali, hone vha muhashi kha mbekanyamushumo ya Nambi ya Dzinambi, kha radio ya lushaka ya SABC Phalaphala FM. Iyo Ndi mbekanyamushumo ine ya hashiwa nga Migivhela ubva nga awara ya vhuṱahe u swika awara ya fumi-na-nthihi.
"Lwa minwaha mivhili yo fhiraho, ndovha ndi tshi ṱalela vhaṅwe vha tshi gonya vhugalatenga vha tshi ṱanganedza pfufho dzavho ndi tshi pfa ndi tshi zwi takalela, afho ndovha ndi tshi dzulela u ḓi vhudza zwauri ḽiṅwe ḓuvha na nne ndi ḓo gonya vhugalatenga uhu nda ṱanganedza yanga pfufho. Ndi tenda zwauri uyu ndi ṅwaha wanga. Ndo no thoma u shuma na mbekanyamushumo, ndo livha khau shuma kha fulo, hone ndo novha na thimu yo khwaṱhaho vhane nda ḓo shuma navho," vha amba.
Muphirimia vho amba zwauri u khethiwa uhu hu amba zwinzhi khavho. "Zwi tou sumbedza uri vhathu vha takalela nḓila yanga yau hasha mbekanyamushumo, ine ya ḓivhea nga vhanzhi hone ndi ine yavha na vhatevheli vhanzhi," vha amba.
Vho ṱahisa u livhuwa havho nga thikhedzo ine vha i wana. "Vhaṅwe vha vhatevheli vhanga vha khou nthumela na zwifanyiso zwau sumbedza uri vha khou voutha u swika zwino. Hezwi zwoṱhe zwi a nṱuṱuwedza. Zwi ṱuṱuwedza na fulo ḽanga, ndi ḓo dovha hafhu ndavha ndi tshi khou dzudzanya vhuṱambo hau fhambana hune khaho ndi ḓovha ndi tshi khou ṱuṱuwedza vhathu uri vha vouthe," Muphirimia vha amba.
U voutha, vha nga rumela mulaedza hune vha ṅwala 111SATMA19 vha rumela nomboro dza 32436.