Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Huna khuḓano yau vhanga mavu a tshiṱentsi kha kusi kwa Ha-Maila vhukati ha Vho-Oliver Nthabalala na Vho-Timpson Sithole. Vho-Nthabalala vhane vhari vha mudzulapo wa Ha-Maila vhari Vhamusanda vho rengisela munwe muthu mavu avho, vhevha bvela phanḓa nau ṱoḓa u fhaṱa khao.
Vho-Nthabalala, vhari vho badela masheleni a swikaho zwigidi zwiraru zwa dzi rannda kha Vhamusanda Vho-Khishimusi Nthabalala vha tshi renga mavu aya, hone vho badela na mbadelo dza khoro.
Vho-Nthabalala vho vhudza vha gurannḓa ya Limpopo Mirror uri vho akhamala vha tshi swika tshiṱentsini tshavho vho wana uri Vho-Timpson Sithole vho tinga mavu avho nga ḓaraṱa. Vho thivhelwa nau fhaṱa kha mavu avho. Vho-Sithole vhovha ṱalutshedza uri vho renga tshiṱentsi kha vhamusanda vha kusi uko.
"Ndi nne muṋe wa mavu o fanelaho. Thinga koni u fhumula Vho-Sithole vha tshi ṋeiwa mavu anga husina thendelano na nne. Ndo vha eletshedza uri vha songo shuma kha tshiṱentsi itshi mafhungo ashu a saathu u dzudzanywa," vha amba. Vho laedza vha gurannḓa ya Limpopo Mirror kha khoro vhane vha ḓo vha khawaṱhisedza uri na ngoho mavu ndi avho.
Muṅwaleli wa khoro ya Ha-Nthabalala, Vho-Patrick Mukwevho, vhari Vho-Nthabalala ndi vhone muṋe wa tshiṱentsi sa izwi hu vhone vhevha tevhedza milayo na mitevhe yo fanelaho yau renga tshiṱentsi.
"Tshiṱentsi ndi tsha Vho-Nthabalala," hu amba Vho-Mukwevho. Vhari vha khoro avha ḓivhi tshithu nga hau rengiselwa Vho-Sithole tshiṱentsi, na mbadelo dzavho a dzingo ṅwalwa ofisini dza khoro. "Ri khou ṱoḓisisa uri mavu a Vho-Nthabalala o swika hani kha uvha kha madzina a Vho-Sithole," vha amba. "Rovha rumela kha khoro ya musanda, hone Vho-Sithole vho eletshedzwa uri vha fanela u sudzulusa ḓiraṱa yavho vha amba na Vhamusanda," vha amba.
Vho-Sithole vho khwaṱhisedza u renga havho tshiṱentsi kha Vhmusanda Vho-Nthabalala. Vhari vho badela masheleni a swikaho zwigidi zwa ṱahe. Vho lindela bammbiri ya thendelo. Vho-Sithole vhari Vhamusanda vha fanela u vhuisa masheleni avho murahu uri vha tende u sudzuluswa kha mavu ayo.
Vha gurannḓa ya Limpopo Mirror vhari vho lingedza u kwama Vhamusanda Vho-Khishimusi Nthabalala, fhedza avha wanala ṱhingoni.