Tshiṱori nga Thembi Siaga. Ṱhalutshedzo nga Khathutshelo Raliphaswa.
Tshikolo tsha fhasi tsha Ketlani tshine tsha wanala Valdezia, tsho vha tshi tshi khou ṱangana na khaedu lwa tshifhinga tshilapfu nga u ṱahela ha desike na zwidulo, zwenezwino vho wana thuso kha khaedu iyo nga u ṋetshedzwa ha bege dza tshikolo dza mavhili dza 100 dzine dza shanduka dza vha desike na zwidulo. Vho ṋetshedzwa nga vha MiDesk nahone vho tikedzwa nga Dzangano ḽa Vhubveledzi ha Thekinoḽodzhi, wo ṋetshedzwa nga Ḽavhuṋa, ḽa 30 Phando.
Hedzi "desiki dzi re kha mavhili" dza vhuṱali dzi ḓa na mavhone a ḓuvha o fhaṱiwaho na vhuimazwikepe ha u ṱaṱisa ha USB, zwine zwa ita uri zwi vhe zwavhuḓi kha vhagudi vha vhupo ha mahayani. Hayani, dzi shuma sa zwiṱitshi zwa mushumo wa hayani, nahone musi dzo pakiwa, dza shuma sa bege dza zwikolo zwi tshimbilaho, zwine zwa ṋea vhagudi fhethu ha mushumo ho ḓikumedzelaho tshikoloni na hayani.
Vhukando vhu sedza kha u tikedza vhagudi vha si na zwishumiswa vhane vha shaya fanitshara ya kilasini yo teaho na mavhone. Nga nnḓa ha u leludza muhwalo wa u hwala bugu dzi lemelaho, muṋeelo u ḓo ṋetshedza fhethu ha mushumo hu shumaho, zwihuluhulu kha vhane vha khou guda nga fhasi ha nyimele dzi re na khaedu.
Muṅwe wa vhabebi, Vho Danisa Shibambu, ane ṅwana wawe a vha kha murole wa R, o ṱanganedza bege iyi, a tshi ri zwi ḓo khwinisa vhukuma nyimele dza u guda. "Ro vha na ṱhahelelo khulwane ya desike, zwihuluhulu nga murahu ha musi tshikolo tshashu tsho no ḓala nga murahu ha u ṱanganyiswa na tshiṅwe tshikolo. Desike idzi ntswa a dzi nga ḓo ita uri u guda hu lelutshele vhana vhashu fhedzi fhedzi zwi ḓo dovha zwa thusa vhadededzi vhashu u langa kilasi dzavho nga nḓila i bveledzwaho mvelele dza khwine," vho ralo.
Vho Lindiwe Masia, thoho ya tshikolo, vho ombedzela uri vhagudi zwino vha nga isa hedzi bege hayani, vha dzula vho kuna nahone vho tsireledzea. "Nga mavhone a ḓuvha o fhaṱiwaho, vha nga guda na musi hu tshi fhungudzwa muḓagasi. Hezwi zwi ḓo ita phambano khulwane na u ṱuṱuwedza vhagudi vhashu uri vha fune pfunzo u bva vhuṱukuni," vho ralo.
Nga miṅwaha ya thandela ya 16 fhedzi, Talita Boodhram u bva Pretoria o thoma mushumo wa MiDesk sa vhukando ha saintsi ya tshikolo tsha nṱha u itela u thusa vhagudi vha vhupo ha mahayani hu si na zwishumiswa zwa kilasini zwi teaho. U bva tsheetsho yo no aluwa ya vha MiDesk Global, bindu ḽa matshilisano ḽo sedzaho kha u khwinisa pfunzo ya vhana vha si na zwishumiswa.
"MiDesk i ṋea vhana tshikhala tsho teaho tsha u ṅwala na u livhisa ṱhogomelo. Arali hu si na desike, u ṅwala havho nga tshanḓa, u ṱhogomela na u ita mushumo wa hayani zwi avha khaedu. Tsedzuluso dzi sumbedza uri tshikhala tsha ngudo hayani tshi khwinisa kushumele kwa akademiki nga 48%, ndi ngazwo MiDesk yo sikwa," vha amba.
MiDesk iṅwe na iṅwe i ḓura fhasi nyana ha R2,000, i fhedza miṅwaha ya 12 nahone i a ṱanganedzwa nga vhulapfu kha miṅwaha yoṱhe. "Ri shumisana na Muhasho wa Pfunzo u ṱalula zwikolo zwo ḓalaho vhathu hune vhana vha dzula fhasi, u vhona uri desike idzi dzi ya kha vhane vha vha ṱoḓa vhukuma," vha amba.