Tshiṱori nga Maanda Bele. Ṱhalutshedzo nga Khathutshelo Raliphaswa
Naho e na miṅwaha ya 26 fhedzi nahone e na tshenzhemo ya miṅwedzi mivhili fhedzi kha nḓowetshumo ya u hasha kha radio, Khathutshelo Raliphaswa u khou ṱavhanya u vhea luswayo lwawe kha ḽifhasi ḽa khasho yapo. Muhashi muswa wa Musina FM o sumbedza u vha muhashi ane a fanela u dzhielwa nṱha, o wana pfufho tharu kha mushumo wa mafhelo a ṅwaha wa tshiṱitshi tsha Musina FM Ḽavhuṱanu, ḽa 29 Ḽara.
Khathutshelo, ane a vha muhashi wa mbekanyamushumo ya masiari ine yavha Tsumbavhuyo (ine ya diswa nga maḓuvha a vhukati ha vhege u bva nga 12:00 u swika nga 15:00), o ṱuwa na pfufho dza: Muhashi o khwinifhadzwaho, muvhali muswa wa khwine sa muvhali wa mafhungo, na muraḓo muswa wa nṱhesa kha Musina FM 2024.
"Kha nṋe, pfufho idzi dzo vha dzi songo lavhelelwa," Khathutshelo o ralo a tshi khou mwemwela. "Zwine nda nga zwi amba ndi uri, musi u shuma nga vhudiimiseli zwi tshi ṱangana na u ḓikumedzela, muthu a nga si vhuye a khakha," a amba.
Khathutshelo ane abva Mpheni, nnḓa nyana ha Louis Trichardt, lwendo lwawe kha nyanḓadzamafhungo lwo thoma kale musi a sa athu dzhena murahu ha khudzaipfi. Mushumo wawe wo thoma sa mugudiswa wa vhuṅwali wa mafhungo kha gurannḓa ya Limpopo Mirror, he a ḓou vha thoma u ṅwala zwiṱori a tshi ṱalutshedza ubva kha Luisimane uya kha Tshivenḓa.
O livhuwa mudzudzanyi wa bammbiri, Vho Anton van Zyl, nge vha mu ṋea tshikhala, naho o vha a si na tshenzhemo kha u ṱalutshedzela. O amba zwauri: "Vho tenda kha nṋe, nahone zwenezwo zwo nṋea fulufhelo ḽa u aluwa kha zwa nyanḓadza mafhungo."
Nga ṅwedzi wa Fulwi ṋaṅwaha, Khathutshelo o ḓou dzhena kha Musina FM sa muvhali wa mafhungo a Tshivenḓa. Nga ṅwedzi wa Tshimedzi, o vha o no ṋewa mushumo wawe wa u hasha mbekanyamushumo ya awara tharu—tshiitea tsha ndeme tshe tsha ḓa na khaedu dzatsho.
"Mathomoni ndo vha ndo tshuwa. Awara tharu ndi ndoṱhe murahu ha khudzaipfi zwo vha zwi tshi pfala zwi vhuḓifhinduleli vhuhulwane, nga maanḓa ngauri ndo vha ndi tshi khou dzhena kha zwienda zwa muṅwe muthu. Fhedzi nga thuso ya mulanguli wanga wa dzi mbekanyamushumo, Sharon Matamela, na mulanguli washu wa tshiṱitshi, Vho Justice Langa, ndo kunda nyofho dzanga nahone nda thoma u ḓiphina nga lwendo lwanga," a amba.
Zwi takadzaho ndi uri khasho yo vha i si tshipiḓa tsha pulane ya mushumo wa Khathutshelo wa u thoma. Lufuno lwawe lwa u thoma ho vha hu u ṅwala. Musi a tshe ṅwana, o vha a tshi isa vhukoni hawe ha u sika kha vhurendi nahone o vha a tshi tama u vha ramafhungo ane a anetshela zwiṱori nga maipfi.
O amba zwauri: "Ndo vha ndi tshi dzulela u ṱoḓa u vha muṅwali. "Fhedzi musi tshikhala tsha khasho tshi tshi ḓa, ndo ḓou thoma u ṱuṱuwedziwa nga vhahashi vha mafhungo vha ngaho Tshifhiwa Doyoyo na Tshifhiwa Mbedzi vha SABC. Vho nṱuṱuwedza uri ndi thetshelese radio na u ṱalela mbekanyamushumo dza mafhungo a zwino u itela u khwinisa vhutsila hanga kha zwa nyanḓadzamafhungo."