Tshiṱori nga: Maanda Bele. Ṱhalutshezo nga: Khathutshelo Raliphaswa.
Vho Khathutshelo Maivha vhane vha vha khotsi a Rudzani Mahanelo, we a ngalangala ṅwaha wo fhiraho na vhanwe vhahumbulelwa vhavhili vho ḓi vhonadza khothe ya magisiṱiraṱa wa Dzanani nga Lavhuvhili ḽa fumbili-ṱahe Ṱhangule. Vha khou senga nga kha mulandu wa u thuba Rudzani.
Rudzani we avha e na minwaha ya malo a tshi ngalangala nga ḽa ṱhanu Ṱhangule ṅwaha wo fhiraho, o bva hayani nga matsheloni a tshi ya kha vhengele ḽa kholekhole kha kusi uko, fhedzi asi vhuye hayani. Musi mme awe Vho Livhuwani Mahanelo vha tshi vhona a sa vhuyi vha bva vho dzhia na bege yawe ya tshikolo uri vha mu ṋee uri asi lenge u swika tshikoloni.
"Ndo ya u mu sedza he ndavha ndo mu ruma hone, nda ita na u shumisa gondo ḽine a shumisa ḽone u ya tshikoloni fhedzi ndi si mu wane. Ndo wana ṅwananyana wanga munwe ane a thusa vhanwe vhana vha tshikolo u buḓa gondo. Fhedzi ndori ndi tshi mu vhudzisa uri Rudzani u ngafhi, ari Rudzani ha athu u swika. Ndo mu ṱoḓa hunzhi nda wana na thuso kha vhadzulapo he ra mu sedza miḓini yoṱhe, fhedzi ra kundelwa u mu wana," vha amba.
Vho Mahanelo vhari zwa zwino a vha khou ḓivha arali ṅwana wavho a khaḓi tshila sa izwi ho no ḓi fhela ṅwaha a sa athu u vhonala hone vha balelwa na u tshila zwavhuḓi. "Nga Fulwi ṅwaha uno, ndo rumelwa mulaedza wauri: 'Muthu e ani fheṱa na nne o mpheṱa. Ṅwananyana wanu o vhulungwa sa tshipuka' mulaedza uyo wa sumbedzisa nauri muthu ane a bva kha kusi kwa dzi RDP Hamavhunga u fanela u fhiswa," vha amba.
U ngalangala ha Rudzani zwo ḓisa nyofho kha vhadzulapo vha Nzhelele, hone vha ofha u vhudzisa mbudziso yauri naa Rudzani u khaḓi tshila kana hani.
Vhathu vhararu vho farwa kha mulandu uyu vhege yo fhiraho, hu tshi katelwa na khotsi a Rudzani. Khotsi a Rudzani vhovha vho vhetshelwa u humbela beiḽi nga ḽa furaru Ṱhangule. Mu fariwa navho, Vho Naledzani Nemukula vho ḓi vhonadza khothe nga ḽa Furaru Ṱhangule. Muhumbulelwa wa vhuraru o farwa nga ḽa fumbili Ṱhangule hone ḓuvha ḽavho ḽa u ḓi vhonadza khothe a ḽi athu u vhewa.
Vho Livhuwani vhari vha pfa vho vhaisala uri muthu ane avha tsini navho a nga ṱumanywa na u ngalangala ha ṅwana wavho. Murangaphanḓa a tshigwada tsha Vhembe Concerned, Vho Richard Mukhaninga, vhari vho takala uri mapholisa vho kona u phuletshedza kha mulandu uyu. "Ro ḓi imisela u gwalaba ri tshi takuwa ri Biaba u ya magisiṱiraṱa wa Dzanani uri ri lwe na khumbelo ya beiḽi ya vhahumbulelwa. Vha fanela u ri vhudza uri ho iteani kha Rudzani," vha amba.